Niu chairlady blong yut otoriti

Vanuatu National Youth Authority i kat naoia wan niufala Chairlady blong hem.

Hemi Ms Florida Lango blong Pentecost.

Eleksen i tekem ples i no longtaem mo Ms Lango nao i lidim risal wetem faev vot mo ranap i Morry Ruben wetem tri vot.

Eleksen ia i folem Act blong Vanuatu National Youth Authority we Palemen i pasem long yia 2018.

Florida Lango i kam niu Chairlady mo Deputi blong hem hemi Morry Ruben.

Florida Lango, Niu Elek Chairlady blong Vanuatu National Youth Authority, i talem se hemi no bin expektem blong karem wan posisen olsem mbe bai emi wok wetem tim blong karemaot ol wok.

“Mi luk fowod blong wok wetem yufala everiwan (bod memba) inkludum honorobol minista wetem Director General blong pavem wei blong ol yut i ko long fiuja,” Ms Lango i talem.

Minista blong Youth mo Sport, Honoroble Willie Pakoa Satearoto, i talem se hemi wan milestone we sekta i kamantap long niu steij blong mekem sua se ministri i kat ol loa blong kavanem olgeta tru long national yut act.

“Act i kivim pawa long bod blong karemaot ol wok blong otoriti mo rekoknaesem wok blong Nasenol Yut Council mo Nasenol Yut association,” Minista Satearoto i talemaot.

“Inokat i naf konsentresen long ol training mo i enaf sapot program we kavman i putum blong tekemap namba blong ol skul drop out we namba i stap ko antap evri yia.”

Minista Satearoto i kongratulatem ol memba blong Vanuatu Nasenol Yut Authority we oli kamaot long ol sekta we oli sapotem wok blong ol yut truaot long ol Provins mo ol Municipaliti.

Henry Vira, Director General long Ministry blong Yut mo Sport i aknoledgem wok  we yut council i stap mekem.

“Act we emi kam into realiti long 2018 blong mekem sua se netwok i stat long nasenol level kasem nakamal hemi karem sapot,” Mr Vira i talem.

Afta long eleksen i kat wan dediksem prea mo afta long hem niufala chairlady mo deputi blong hem i mekem smol kastom seremoni i ko long Minista Satearoto long eria blong Vanuatu Broadcasting mo Television Corporation.

(Visited 44 times, 1 visits today)

About The Author

You might be interested in