Niu Coat blong arms statue

Kavman i lonjem wan niufala Coat blong arms statue long Independence park long wik ia long Port Vila.

Minista blong Internal Affairs, Honoroble Ismael Kalsakau nao i katem ribon blong hem mo semtaem openem selebresen blong 41 independens long Port Vila.

Hemi talem se lonj blong state symbol ia hemi wan nara milestone ajivmen blong Republic blong Vanuatu.

“Mi biliv se ples blong statue ia hemi long park ia from eria ia nao independens seremoni i tekem ples long hem long 1980,” Mr Kalsakau i talem.

“Mi askem ol citizen blong rispektem ol properti long eria ia.

“Societi blong yumi i beis long rispek mo rispek i stap long mama loa.

“Hemi bin wan longfala wei blong kasem 41 yia blong independens long yia ia.

Minista Kalsakau i kol blong pipol i selebrate wetem tinktink blong majuriti.

“Selebresen ia hemi taem blong ol citizen blong Vanuatu i lukluk bak long ol developmen we ol pas kavman i bin mekem,” Mr Kalsakau i talem.

“Hemi taem blong yumi promotem maturiti taem yumi setem ap ol own bisnis blong yumi.

“Taem blong komplen i mas stop; ol citizen i mas stat blong kat ol gudfala diskasen blong sapotem wanem kavman i stap mekem.

“Mi biliv se ol Ni-Vanuatu oli kat skil mo talent blong muvum developmen long Vanuatu.”

Minista Kalsakau i talem se Yumi 41 i minim se Vanuatu i save tekem ol jalenj sapos hemi biliv mo kat faith.

Hemi talem se independens selebresen i kam wetem plante fom blong aktiviti mbe i mas kat pis mo uniti.

“Ol polis ofisa blong yumi oli stap stap blong provaedem securiti blong mekem sua se i kat pis,” Minista Kalsakau i talem.

“Taem yumi soem rispek, yumi sta kivim wan gudfala exampol long ol pikinini, yut mo futja generation.”

Long yia ia kavman i aloketem wan amaon blong VT 8 million long 41 independens anivesari.

Mo evri provins i sud tekem VT 350,000.

Selebresen blong independens long Port Vila bae i stap long tri dei wetem ofisel seremoni long Friday moning.

 

 

(Visited 421 times, 1 visits today)

About The Author

You might be interested in