Niu eapot long saot Maewo

Kavman bae i bildim wan niu eapot long saot Maewo.

Eapot blong Nasawa hemi wan long ol prioriti divelopmen we Council blong ol Minista i apruvum long miting blong olgeta long Saratamta, East Ambae long wik ia.

Prime Minista Loughman i talem se naoia ol masin blong Public Works i stap long West Ambae blong ol engina i wok vinisim ol rod longwe, mo afta bae oli muv i ko long Maewo blong bildim eapot ia.

Area Administrator long Nasawa vilij long saot Maewo, Densly Rasa, i talem long VBTC Nius se hemia i wan drim kam tru blong ol lokol i kasem isi akses long saed blong health emergency.

Mr Rasa i talem se sapos eapot i stap long Nasawo eria bae i isi.

“Naoia eapot we i stap long not i stap long bush mo i had tumas blong ol lokol i kat akses long hem espeseli taem wan man i sik,” Mr Rasa i talem.

“Ol sik man ia oli nidim gudfala tritmen long Santo o long Efate mo i had we blong kasem onli eapot long not.

“Majoriti blong ol pipol oli liv long saot Maewo mo oli spendem VT8000 long transpot blong ko long not Maewo,” Mr Rasa i talem.

“Ol mama we oli bonem bebe oli mas travel longwe long bot blong kasem Lolowai hospitol long Ambae.

“Wan moa samting se sapos plane i lan long eapot long not long naet, i nokat trak, bae ol lokol i mas wokbaot longwe blong kasem saot bakeken.”

Mr Rasa i talem se hemi glad we kavman bae i tekem eapot ia wan prioriti from bae i nomo kost tumas long ol pipol.

“Mifala i bin mekem plan long komuniti mo mekem ol kliarens vinis long eria we hemi 1100 mita,” Mr Rasa i talemaot.

“Plante fama oli yusum ship blong salem ol produs from hemi isi mo jip kompea long plane.

“Mbe niu eapot bae i mekem isi akses long doa step blong pipol

Prime Minista Loughman i talem tu se tasil rod long Pentecost mo Ambae hemi ol prioriti divelopmen mo kavman i wandem luk se i komplit long Penama bifo oli muv i ko long nara provins.

Ol anaonsmen ia i kamaot long Penama dei long Ambae.