Niu freezer blong ol Sanma fisherman

Faev fishing asosiasen long Sanma i kat ol niu sola freezer system long wik ia blong save rikodem ol fish data mo presevem ol fish.

Ol asosiasen ia i kamaot long faev eria i kat tri blong Santo mo tu blong Malo.

Vanuatu Bureau blong Standards anda long Ministry bong Trade i step ap mo wok wetem Fisheries Dipatmen blong fulfilim ol standard blong fisheries long fasin blong handelem mo preservem kwaliti blong fish anda long coastal fisheries projek.

Fisheries Department wetem Bureau Of Standards tim bae oli mekem instalasen blong ol kolkol fasiliti ia mo ranem training blong ol huk teknik wetem safe fish method.

Chief Executiv Ofisa blong Vanuatu Bureau blong Standard, Ruth Amos, i talem se fisherman i save earnem wan good living aot long wan qualiti wok mo sale blong wan hae prodak.

Mrs Ruth i talem se oli disaed blong wok kolosap wetem fisheries dipatmen blong help implementem sam pat blong projek from kwaliti i no stap long maket mbe hemi stat daon long fisheries.

Sammy James, Manager Fisheries Seafood, i talem se fisheries sekta hemi bigwan from ol aktiviti blong fishing ol komuniti i dipen long evri dei laef wetem food security.

Hemi talem se ol kaen fasiliti we oli kasem bae i helpem olgeta blong produsum plante kwaliti fish mo hao blong oli presevem blong stopem ol post harvest isu(ol kastoma i saplae wetem smol fish o fish i kat low kwaliti).

Olgeta kolkol storage fasiliti ia bae oli instolem olgeta long Tasiriki, Ravlepa, Jereviu long Santo mo Paone wetem Avunatari eria long Malo.

Hemia i folem proses blong data kolesksen blong fish long wan eria we ol asosiasen ia oli provaedem long dipatmen mo folem availabiliti blong olgeta fishing zone, aotsaed long ol conservation eria.

Aset hemi blong Kavman mo olgeta memba blong ol asosiasen ia i wok blong lukaotem folem kontrak akrimen we oli saenem wetem Bureau blong Standards, Fisheries Dipatmen mo Sanma Provincial Kavman.

 

(Visited 122 times, 3 visits today)

About The Author

You might be interested in