Niu incubator blong kam long October

Ol niu incubator blong ol bebe long Vila Central Hospital bae i kam long October.

Hemi konfemesen we i kam long Manejmen blong Vanuatu Broadcasting Television Corporation(VBTC).

VBTC Finance Ofisa, Roger Jenkins, i talem se bae ship i pas tru long ol nara pot bifo i kasem kaontri.

“Next problem hemi ol ship, ol incubator bae oli yusum fo difren ship port,” Mr Jenkins i talem.

“India, New Zealand, Fiji mo Port Vila.

“Taem oli save kam hemi long namba 11 october so mifala i wet blong kam tru long stret taem.

“Mo hemi wan gud nius long evri wan.”

“Ating bae yumi tinkbaot VBTC i bin holem wan radiothon long January mo wok blong hem i blong faenem mani mo pem ol incubator,” Mr Jenkins i talemaot.

“Mifla i kat gud sapot long embassy blong China mo New Zealand High Commission.

“Mo ol papa, mama mo pikinini i bin help tu so mifala i pem long incubator long manis May.

“Mbe naoia sam wari, COVID i spoilem ol manufacturer long India mekem se oli nosave mekem ol shipmen.

Mr Jenkins i talem se naoia oli kasem toksave se shipmen bae i kam tru long October.

Hemi wan total blong 10 incubators we bai oli arrive out long VT 5million we VBTC hemi reisem long fes ever Radiothon even blong kaontri.

Dr Orelly Thyna long Vila Central Hospital, i bin talem se oli stap lukluk blong mas karem 20 niu incubator blong save mitim demand we i stap naoia.

Hemi talem se long las yia, Vila Central Hospital i rikodem aroan 309 bebe we oli nidim incubata from i kat 25 bebe oli bon long wan manis mo oli nid blong stap insaed long glass.”

“Ol incubator ia, i kat plante detekta long saed blong hem, we i letem mifala i save se bebe ia temperaja blong hem i kolkol mo yumi save wome ap hem.

“Samtaem environmen we hemi slip long hem i kolkol mo yumi nid blong hitim ap blong mekem ples i wom.

“Mo sapos ol samting ia i nokat bae bebe i save kolkol tumas mo hemia bae oli ko tru long plante problem.

“Resen ia nao mifala i wantem moa incubator kwiktaem blong stopem problem ia.”

Dr Thyna i talem se taem i kat ol niu incubator wetem ol niu masin blong help bae oli save provaedem gudfala seves we Ministry blong Health i stap talem.