Niu kavman i mas form bifo 21 dei

Niu kavman blong Vanuatu we pipol bae i elektem long tu dei taem i mas fom bifo 21 dei.

Clerk blong Palemen blong Vanuatu, Raymond Manuake i talem long VBTC Nius se notis blong fes siting blong Palemen bae i ko long ol niu elek Memba blong Palemen long fes 10 dei afta long eleksen, mo i mas hapen bifo 21 dei.

21 dei ia i stat long Octoba 13 long wik ia we hemi dei blong eleksen i ko kasem long Novemba 3, 2022.

Mr Manuake i talem se fes siting ia hemi blong ol 52 niu memba blong Palemen i mekem ol promes blong olgeta mo saenem rol blong palemen.

Hemi talem se bisnis blong fes siting ia tu hemi blong elektem wan niu spika blong palemen wetem nara fo deputy spika blong hem. Proses blong fasilitetem hemia bambae wan sina memba blong Palemen bae i tekem jea blong elektem wan niufala spika blong Naspalemen blong Vanuatu

Mr Manuake i talem se afta long hemia, spika blong Palemen bae i fasilitetem eleksen blong wan niu Praem Minista blong wan niufala kavman blong Vanuatu mo afta i kat wan shot brek blong Praem Minista i apointem ol minista blong hem.

Hemi i expleinem long VBTC Nius se palemen bae i sidaon bakegen blong stanemap ol palementri standing komiti bifo koling blong fes siting i kam long en blong hem.

Beis long niu standing oda blong Palemen, Nasenal Palemen blong Vanuatu bae i ko long spel stat long December 15 kasem January 15.

Folem obsevesen blong VBTC Nius, niu kavman blong Vanuatu bae i kat wan taet sketsul blong Palemen i pasem Nasenal Badjet blong opereit long hem stat long January 1, 2023.

I kat posibiliti se niufala kavman i save pasem badjet blong hem bifo manis March, 2023 long wan extra odineri sisen blong palemen be hemia i dipen bikwan long disisen blong niu kavman.

 

(Visited 296 times, 1 visits today)

About The Author

You might be interested in