Niu passport printa masin

Wan niu passport printa masin blong VT2.5 million blong kasem kaontri long nekis wik.

Director blong Passport Services, Jeffrey Markson i konfemem long VBTC Nius tete se printa masin blong passport ia bae i kam long Germany.

“Naoia we i stap, printing blong ol passport i stop sins Thursday las wik from system i olfala; Mo yumi wet long niu printa blong kam samtaem long Monday -Thursday nekis wik,” Mr Markson i talem.

“Naoia we i stap, bae ol ofisa i traem aploadem evri aplikesen we hemi ova 1000 blong February vinis i ko long data blong taem masin i kam mbe yumi print wantaem.

“Masin we i nogud ia, hemi blong printem ol infomesen we bae yumi putum long ol passport.”

Mbe Mr Markson i talem se supplementary badget blong niu passport software system i stap long Palemen session ia.

“Software we yumi yusum ia yumi karem bak long 2009 mo afta 10 yia yumi stil yusum. Pipol sapos oli lukluk gud yumi askem nomo birth certificate wetem foto ale yumi scanem putum long system be i kasem wan steij we hemi nomo wok kwik. So yumi mas apgredem. Dipatmen i toktok long man we i developem system ia be hemi nomo save apgred bae yumi nid blong karemaot mo putum long wan niu wan. Hemia from bae i kostem bigfala mani sapos yumi wok lem bakegen,” Mr Markson i talem.

Mr Markson i talem se system we oli stap yusum naoia hemi wan temporari arenjmen wan we Ofis blong Government Chief Information Officer wetem help blong ol lokol Information Technology (IT) Ofisa i trae had long las manis(July) blong kriatem spes long passport system ia blong yusum.

Naoia isu hemi printa masin we hemi talem.

Pipol i bin komplen long social media long wik ia from oli nidim seves blong kat wan niu passport.

“Mifala i askem patience blong evriwan long taem naoia,” Mr Markson i talem.