Niu Polis Komisina blong Vanuatu

Vanuatu i gat wan niufala Polis Komisina long wik ia.

Hemi Robson Iavro blong Santo mo hemi bin holem post ia olsem Akting Komisina blong tu mo haf yia.

Hed blong State, His Excellency, Pastor Obed Moses Tallis, nao i handem ova sword blong Mr Iavro long Tuesday wik ia long Independence park long Port Vila.

His Exellency Pastor Tallis i kol blong niufala Polis Komisina, Mr Iavro blong i apholdem loa mo sevem pipol wetem dignity.

Hemi talem se sword we Mr Iavro i kasem hemi olsem toktok blong Papa God long Hebrews 4; 12 we i sharp long tu saed mo i kat blessing taem hemi wokbaot stret mo curse taem hemi no folem.

“Loyalti blong yu i ko long pipol mo kavman blong Vanuatu i mas equal mo kat rispek long hem,” His Excellency, Pastor Tallis i talem.

“Mi kol long yu olsem niufala polis komisina blong mas manejem gud ofis blong yu wetem dignity.

“Mo evri duti yu mas karemaot long profesenol mana.

“Mi biliv se bambae yu no abusum ofis mo posisen blong yu long wan personal interest.”

His Excellency, Pastor Tallis, i talem aot se bae hem mo ol pipol blong Vanuatu i stap behaen long hem long ol seves we bae hemi putum aot.

Hem i congratulatem Mr Iavro mo wisim hem wetem famili blong hem wan saksesful term blong fo yia long posisen ia.

“Prea blong mi se pawa blong holy spirit blong hae God bambae hemi kivim yu wisdom mo gaedem yu long wok we bae yu mekem olsem polis komisina blong ripablik blong Vanuatu.”

Niufala Polis Komisina, Iavro, i talem tankiu bigwan long kavman blong save kat tras mo konfidens long hem long posisen ia.

Hemi talem se bae hemi mekem sua se wok blong hem i neutral oltaem.

Mr Iavro i talem se wik ia hemi makem wan moa niu japta long sekta blong fos.

“Mi glad mo priveledge tumas blong holem posisen ia,”Mr Iavro i talem.

“Posisen ia i kam wetem bigfala wok; COVID-19 i kam wetem jalenj blong boda lok daon, mo risal blong economik blong yumi i drop mo pipol oli lusum wok.

“Yumi konsen bigwan long ol kraem we i kontinu blong afektem ol komuniti blong yumi espeseli ol vaelens we i afektem ol mama mo ol pikinini, ol korapsen we i stap afektem ol komuniti, yumi tekem not long drug trade we i stap mekem tumas aktiviti raon wol we i no folem loa mo karemaot laef blong plante inosen pipol, marijuana i kam wan serious konsen long society.

“Mo Polis bae i wok had blong adresem ol jalenj ia.”

Deputy Prime Minista, Ishmael Kalsakau we i lukaotem polis i talem se hemi trastem Mr Iavro blong hemi mekem wan gud wok.

Robson Iavro i namba 13 polis komisina blong Vanuatu mo hemi spendem 20 yia long seves blong fos.

Seremoni i stat taem His Excellency, Pastor Tallis, i mekem wan guard blong honor wetem ol fos memba, ol ofisa blong Police Force, Vanuatu Mobile Force wetem Police Maritime Wing.

 

 

 

(Visited 130 times, 1 visits today)

About The Author

You might be interested in