Niu yam harvest

Tongariki/Buninga niu yam harvest i hapen long wik ia.

Eria Administrator blong Tongariki/ Buninga, Donald Firiam i talem se pipol i kamaot wetem difren kaen blong yam.

“Hemi wan anual event we mifala i stap selebretem evri yia long Tongariki/Buninga eria kaonsel mbe i hapen long ol difren taem. Hemi niu yia selebresen blong harvestem ol niu yam blong karemaot tabu blong pipol i save ko tekem yam,” Mr Firiam i talem long VBTC Nius.

“Long Tongariki aelan i kat faev vilij, long tete Erata hemi havestem yam blong hem wetem Lewaima vilij. So ol nara vilij samtaem long wik ia bae oli harvest. Fes harvest hemi wan taem we mifala i tekem ol yam i kam tugeta mo prea long hem mifala i serem tugeta. Hemia i stat bifo vinis long taem blong ol apu blong mifala.”

Mr Firiam i talem se oli planem ol difren kaen yam.

“Mifala i planem plantem nao ol soft yam mo i kam long ol difren species; I kat purple yam we ol smol we i thin mo i kat ol bigwan we i purple. Ol speses blong yam ia i kat ol difren taste. Sam long ol yam ia taem yu kakae yu tastem save se hemi difren long yam we yu bin kakae long bifo yestete. Mo wan impoten samting se mifala i no stap kakae flatem ol yam ia, mifala i mas leko i stap blong save planem bak,” Mr Firiam i talem.

“I kat hemia we i longfala i ko daon; Hemia we i fatfat nomo we i kat ol difren kastom nem blong hem we ol apu i putum bifo i kam we i kat ol difren taste. Sam yu kakae i dry, sam i nogat wota tumas.

“Olsem wan fani toktok we yumi stap talem evritaem yu kakae yam blong Tongariki mo Buninga yu harem olsem bae i stap pulum tang blong yu lelbet. So mifala i kipim i stap evri yia. Wan man we i kat garen yam i mas kipim ol difren kaen yam ia.”

Mr Firiam i talem se hemi ol fasin blong ol apu bifo we oli mas holem taet.