No inkrisim politician haos alaowens-Opposition

Opposition i kol blong no inkris long politician haos alaoens.

Disisen ia i kamaot long namba 26 miting blong Council blong ol Minista blong mekem sam jenis long ofisiol salari act.

Lida blong Opposition, Honoroble Ralph Regenvanu, i talem se disisen blong inkrisim haosing alaowens blong ol politisen i no stret long situasen blong kaontri tete.

Mr Regenvanu i talem long VBTC Nius se i nokat wan gudfala risen blong liftimap haosing alaoens.

Hemi pointemaot se i gat ol eria blong nid we kavman i mas adresem mo i no fea long ol pipol we i pem tax.

“Mi kol long praem minista blong no saenem Gross Runumeresen Tribunal diteminesen blong inkris blong haosing alaoens blong ol Memba blong Palemen mo ol nara politisen from situesen blong kaontri i no nidim from pipol i strakel blong mekem living blong olgeta, “Mr Regenvanu i talem.

“Plante i lusum wok from COVID-19. Council blong ol Minista disisen ia i soem se ol lida oli tingbaot olgeta nomo mbe oli fogetem ol smolsmol man.

“Wanem mesej nao bae ol bigfala inkris blong mani ia i sendem i ko long ol pipol blong Vanuatu.

“Pipol i tokbaot plante finis se kavman ia i mekem wan rong desisen finis.”

Minista blong Finance mo Economic Management, Honoroble Johnny Koanapo, i talem se oli no implementem disisen ia yet.

“Hemi wan kavman desisen be hemi no impliment yet,” Minista Koanapo i talem.
“Oli kivim long Gavman Rinumeresen Tribunal blong hemi mekem final diteminesen long hem. Spos hemi luk se i nidim blong inkris o bae hemi dropem i stap long olgeta.

Minista Koanapo i askem pipol blong no yusum Council blong ol Minista disisen ia olsem wan politekel propaganda we i nokat wan samting i hapen yet.

VBTC Nius i kasem toksave se sapos inkris alaowens i kam long efect bae Praem Minista i karem VT400,000, Deputy Praem Minista bae i tekem VT 300,000 mo ol stet minista hemi VT 250,000 olsem haosing alaowens.

(Visited 601 times, 1 visits today)

About The Author

You might be interested in