No pawa long sam ofis-Luganville

Sam kavman ofis long Luganville i nogat pawa from oli fail blong pem electrisiti bill long taem.

Ol ofis ia, i gat Finance, Lands mo Sanma Rural Health.

Wan Reliable Sos long kavman we i no wandem nem blong hem i kam aot i talem se slo proses blong paymen hemi from sam ofis long Luganville, system hemi no opereit gud yet afta we kavman netwok i bin daon long en blong 2022.

Hemi talem se sam kavman woka we oli risponsibol long ol peimen blong ol bill oli stil stap long holidei.

VBTC Nius i kasem infomesen se taem fulap wokman i stil stap long spel blong olgeta, smol wokman we oli sapos blong wok oli kam in mo aot nomo long ofis from i nogat pawa.

Long doa blong Lands Dipatmen, wan notis i talem se wok bai i stat bakegen long  January 13 hemia long Friday.

Public Works Dipatmen tu pawa i bin aot long full dei long Wednesday.

Seves we i nidim electrisiti hemi stop sins long Wednesday wik ia.

Finance Dipatmen ofis long Luganville i talem se main ofis long Vila i stap prosesem ol peimen.