No VNPF peimen i mekem no Kavman sapot

Kavman i nosave kivim stimulus pakej long ol bisnis haos from oli no pem Vanuatu National Provident Fund blong ol staff.

Finance Dipatmen i kivim las janis long ol bisnis blong mas pem ol providen fund blong olgeta.

Dipatmen blong finance hemi putum out wan notis blong cut off deit blong ol bisnis oli mas provaedem ol risit blong VNPF paymen blong ol staf blong olgeta stat long May las yia kasem Decemba.

Coordinator blong Stimulus package, Tony Sewen, i talem se plante bisnis oli aplae mbe fulap oli no mitim rikwamen i mekem se kavman i no rilisim eni vatu long olgeta. Mein wan nao hemi evidence se peimen blong providen fund.

“Hemi wan rikwamen blong evri bisnis we oli aplae from stimulus package oli provaedem evidens se oli stap pem VNPF blong ol wokman blong olgeta, evidens ia i soem se oli kat ol aktiv wokman from mani we kavman i givim hemi blong helpem olgeta blong pem salari,” Mr Sewen i talem

“Bisnis hemi mas provaedem ol VNPF reciept ia evri manis blong kavman i save rilisim mani long olgeta.”

Mr Sewen i explainem se namba blong ol bisnis we oli providem VNPF risit i kontinu blong drop stat long manis May kasem Decemba.

Customs hemi provaedem se 422 bisnis tru aot long koantri oli eligible long stimulus package, aot long namba ia 182 bisnis nomo oli bin aplae long Manis May mo 165 binis nomo oli kompletim rikwamen mo karem fands long May.

I kat 17 nara bisnis we oli no kompletim Vanuatu National Provident Fund rikwamen blong olgeta kasem tete.

Long manis June aot long 165 we oli bin fuli kompletim rikwamen long manis May, Finance hemi pem nomo 125 bisnis.

Hemia i showem se 40 bisnis we oli karem funding long manis May oli no pem VNPF blong ol wokman blong olgeta i mekem oli no karem mani long manis July.

Kwesten i stap se mani ia i ko wea?

Finance rikod i soem tu drop bagegen long manis July i ko long 99 bisnis pem olgeta, August 71 nomo mo September 60 bisnis mo October 16.

“Kavman hemi stap givim janis long ol bisnis ia blong oli submitim ful VNPF risit blong ol wokman blong olgeta blong las yia bifo en blong February.”

“Afta long deit ia bae i nomo kat eni moa bisnis i eligibol blong karem Stimulus package.”

General Manager blong Vanuatu National Provident Fund, Parmod Archery,  i talem se namba blong ol VNPF kontribusen i stap drop bigwan.

Vanuatu Chamber blong Commerce mo Industry chairman, Antoine Boudier, i talem se bai i kivim wan komen long ol dei we i stap kam.

Aot long VT560 million blong wage subsidy, kavman hemi yusum finism VT110 million.

 

 

 

(Visited 374 times, 1 visits today)

About The Author

You might be interested in