Not Ambrym medikol akses wan disasta

Wan pikinini long Not Ambrym hemi stap long wan kwik nid blong kasem medical operation afta we knife i katem bel blong hem.

Ripot long ol Reliable Sos i talem se oli facem jalenj blong travel i ko long Craig Cove long West Ambrym from shotej blong fuel hemia afta we ship i nomo kasem aelan from festive sisen.

Sos we i stap olsem eye witnes long taem we oli karem smol 6 yia old boy ia i kam long klinic area, i talem se smol boy ia hemi stap pleple mo mestem knife i katem nogud bell blong hem mo hemi lusum fulap blad.

Hemi ripotem se Head blong Health Practitioner long ples ia i toktok long Dr Basil Leodoro we i stap help blong organisem wan jata blong pikinini ia , mbe i lukim se evri plane i fulap.

Mbe i kat konfemesen se Unity airline bai i save pikimap pikinini tomoro moning long 8am.

Mbe nara jalenj hemi blong faenem wan bot blong transpotem olgeta kasem Craig Cove airport.

“Boy blong me i kasem aksiden ia mo mifala i traem blong karem hem i ko long Airport mbe i no posibol nomo, plis kavman sapos hemi save mekem gud kwik taem airport blong mifala long Not,” Mr Rexly papa blong 6 yia old boy i talem.

Hemi talem se hemi harem nogud tumas long smol boy blong hem we i no save kasem medical help kwik taem.

Boy blong hem i bin kasem kil long 1pm tete, mo oli bin travel 2 haoa blong kasem ol medical ofisa long klinic eria.

Naoia oli stap wet yet long wan bod we bai costem olgeta ova VT12,000 blong kasem airport.

Sos ia hemi resem konsen se situesen blong medical emergency akses hemi nogud, mo oli mas travel kasem Craig Cove blong kasem plane long taem olsem.

Mo clinic haos we i stap hemi destroy sins Saeklon Harold kasem tete oli nogat wan niu bilding.

Hemia i putum bigfala risk blong save ded long plante pipol we oli nidim kwik medical help.

Ripot long aelan i talem se 6 yia boy ia, knife i katem bell blong hem mo kut blong hem i kamaot long bell blong hem.

Naoia we i stap ol parents blong boy oli konfemem se hemi laef yet.