Oda blong kokonat bitel long ol ship

Ofis blong Maritime Regulator i kasem wan oda long wik ia blong kontrolem muvmen blong ol ship from kokonat bitel.

Marine Regulator Hickinson Siba i talem se oda ia  blong mekem sua se Coconut Rhinoceros Beetle i no folem ol ship taem oli stap aot long Port Vila blong ko long ol nara aelan.

Hemi talem se oda ia i talem se ol ship oli mas aot nomo long dei i ko long olketa aelan mbe I no long naet.

Mr Siba i talem se sins September, taem kokonat bitel ia I kasem Port Vila, Dipatmen blong Biosecurity i no bin givim eni instraksen blong stopem ol ship blong no ko long ol aelan.

“Ol ship i bin stap aot nomo long naet from mifala i no kasem eni oda blong Coconut Rhinoceros Beetle,” Mr Siba i talem.

Mr Siba I talem se be I gat wan nara opsen blong ol vessel I save folem hem I blong ol ship I save aot long naet mbe oli mas ofem ol laet blong olgeta kasem taem oli bitim Iririki.

Hem I talem se ol ship I mas ofem laet from laet I save atraktem ol bitel ia mo bitel I save flae kam long ship mo long wei ia I save ko long ol nara aelan long kaontri.

Hem I talem se bigfala kwesten we I stap naoia hem I weta bitel ia I ko long ol nara aelan vinis o noyet.

Dipatmen blong Biosecurity i bin talem long wan press conference long manis blong September se bae oli wok tugeta wetem Ofis blong Maritaem Regulator blong mekem sua se ol ship long Port Vila harbour oli mas aot long dei taem blong go long nara aelan blong stopem muvmen blong kokonat bitel ia.

Biosecurity Ofisa, Touasi Tiwok, i talem se “Risen from wanem dilei long oda hemi from Council blong ol Minister i jes diskasem long miting blong olketa long Lakatoro, Malekula i no longtaem i pas mo afta long hem oda i jes kamaot.”

“Mo naoia hemi impoten blong kontenem blong mekem se hemi no spred i ko long narafala eria.

Mr Siba I talem se naoia hem i stap wok long wan leta blong pasem toksave ia i ko long everi ship ona.

(Visited 424 times, 1 visits today)

About The Author

You might be interested in