Oda saen blong stopem agent leta

Wan oda bae i saen long wik ia blong stopem ol agent blong Labour Mobility i nomo raetem leta blong pipol i tekem passport.

Director blong Passport Services, Jeffrey Markson i talem se leta ia i nomo mitim pepes blong hem from sam agent i stap jajem fi long pipol.

“Dipatmen i bin lukluk long isu ia mo long wik ia hemi givim instraksen long compliance tim blong bambae yumi wok long wan amendmen blong regulation oda ia blong amendem(mekem jenis) form ia blong karemaot rikwamen blong leta ia. Mo bae yumi wok wetem ofis blong DG mo leba blong adresem eria ia.

“Risen from wanem mifala i wantem tekem aot hemia hemi blong nomo putum wan nara burden long citizen blong yumi. Yu ko pem wan nara dokumen ale yu pem hemia. Long wan long ol rikwamen blong yumi se sapos yu stap ko long RSE(Recognised Seasonal Employer) o Seasonal Workers Program(SWP) yu mas tekem wan leta blong ol agent.

” Mbe Compliance tim i faenem ao, naoia hemi kam wan samting we sam agent oli stap jajem ol citizen, taem yu ko yu askem wan leta oli se ale pa mi mekem wan leta blong yu blong hemi kam tekem passport.

“Once oda i saen long State Law bae yumi lukluk blong implementem.”

Ol komplen i kamaot long pipol long fesbuk se from wanem taem ol lokol i wantem ko skul o ko wok from own nid blong famili mbe oli mas aplae from passport mo kat leta.

Post long wik ia long fesbuk i kwestenem immigration se passport hemi wan personal national ID mo oli kat raet blong kat.

“Tintink blong dipatmen blong hemi putum rikwamen ia hemi blong manejem muvmen blong ol pipol blong yumi i ko aot long kaontri. Yumi no wantem se yumi givim aot plante passport ale fesem wanem ol bisnis haos i stap fesem taem ol wokman we oli wok gud mbe oli travel ale hemi had blong oli faenem ol man blong mekem wok.

“So dipatmen i putum hemia tu i stap in ples blong helpem yumi tu blong kat wan rikod. I minim se yumi save ol man ia i travel long agent ia o hemia long agent ia. Yumi mekem tu blong helpem ol agent from oltaem oli kam se ol wokman blong mi ia bae oli travel long nekis wik, so oli karem list i kam, yumi luk wetem leta we agent i mekem mbe yumi faenem aot se kavman i sapotem ol agent mbe i kat abus blong jajem mani long pipol.”

Mr Markson i talem se taem oda i saen bae oli wok folem.

 

(Visited 4508 times, 2 visits today)

About The Author

You might be interested in