Ol banana bot i mas rijista-Maritime

Ol smol banana bot i mas rijista long Maritime Regulator bifo oli stap seves long solwota.

Lloyd Fikiasi, Acting Ofisa in jaj long Maritime Regulator, i talem long VBTC Nius se i kat ol benefit blong hem.

Hemi talem se i kat fi blong VT17, 250 inkludum VAT mo hemi faev yia registresen.

“Sapos yu kat wan smol bot, plis visitim Ofis blong Maritime Regulator o kol 114 blong yumi rijistarem yusum stika,”Mr Fikiasi i talem.

“Wam samting we hemi gud blong rijista hemi from yumi kat data blong yusum long ol polisi developmen blong sefti mo search mo rescue. So taem yumi luk wan bot, mo namba long hem yumi save stret hu owna blong hem.

“Taem wan bot i lus bae yumi se long Aniwa afta oli faenem long Torres grup, hemi isi blong yumi faenem hu owna blong bot tru long namba. Sapos yumi no rijistarem bae yumi nosave se bot ia blong hu ia, hem kam long Solomon Islands o Fiji. Hemi kat tu isurens pepa mo tu long saed blong wan guarentee long propeti, yu save putum bot blong yu tu kam insaed from hemi folem loa.”

Mr Fikiasi i talem se sefti blong pipol hemi impoten long solwota.

“Taem yumi ownem wan bot, yumi mas mekem sua se i kat ol sefti tul tu i stap insaed olsem laef jaket, ol distress signal we yu save yusum taem yu nidim help long solwota o ol hand flya we yu save yusum long naet,”Mr Fikiasi i talem.

“Stika hemi laef nomo blong 12 Manis mo long 2022 bae hemi expire long March.”

Mr Fikiasi i talem se ol bot operata we oli kat stika olgeta nao i alao blong operate ol seves long solwota.

“Yu save operate haed mbe yu mas save se sefti i stap long hand blong yu,” Mr Fikiasi i talem.

“Ol Ofisa blong maritime oli stap long ol aelan mo bae oli save kasem yu.”

Maritime Regulator i talem tankiu long evri ship mo smol banana bot owna blong save folem loa long taem blong festiv sisen ia.

 

 

 

(Visited 51 times, 1 visits today)

About The Author

You might be interested in