Dilei long Santo kot kes blong Big Bay Bush inciden

Santo Magistrate Court hem i rilisim 16 suspek blong Big Bay Bush incident long bail.

Commander Chief Inspector long Sanma Police Patrol, Rexton Langon, i talem se court hem i no bin save harem Preliminary Inquiry blong kes ia long Thursday from prosecution hem i nidim moa taem blong i priperem kes from hem i involfem 16 defendants wetem ol difren jaj akensem olgeta.

Hem i talem se prosecution i nid blong kompilem wanwan file blong olgeta suspek akoding long ol difren jaj ia, mo hem i askem blong court i kivim moa taem long hem.

Ol posibol jaj we i stap akensem ol suspek ia hem i unlawful assembly, assault, riot, theft mo obstructing police officers.

Olgeta suspek ia bae oli apia bakeken long 5 August from preliminary inquiry blong harem moa long kes ia.

Wan staff blong Espiritu long left i handem ova ol matres ia long Ps Gabriel Puneret, right.

Hem i talem se olgeta defendant ia oli bin mekem wan fomol aplikesen i ko long kot blong askem blong kot i rilisim olgeta long bail mo kot hem i grantem aplikesen ia.

Mr Langon i talem se Magistrate Court hem i rilisim olgeta suspek ia long bail mo i imposem sam bail kondisen long olgeta.

Ol bail kondisen ia hem i blong ol suspek i no mas intafea wetem ol witnis blong prosecution, oli mas koperet wetem polis investikesen tim mo bae oli apia long Luganville Police Station long everi Fraedei blong everi wik blong saen, hem ia blong asurum se oli stap araon.

“Yumi wet nao blong prosecution hem i kompilem everi kes blong hem tugeta bifo hem i sud kohed long Preliminary Inquiry long 5 Okis,” hem i talem.

Pastor Gabriel Puneret, long Big Bay Bush, i talem se olgeta famli we oli bin lusum haos mo ol propeti blong olgeta long inciden ia oli stap slip naoia long haos blong ol neighbor mo relative blong olgeta.

Hem i talem se ol pikinini we oli bin lusum ol ting blong scul blong olgeta oli no bin save kobak long scul yet.

Hem i talem se wan bisnis haus long Santo, Espiritu, hem i bin kam in blong helpem olgeta famli ia wetem sam matres blong silip mo ol kijin utensil olsem ol dis, cup mo plate.

“Oli bin kivim siks matres, tu dabol matres mo fo single matres. Hem i bin kivim long mi mo mi karem i ko long olgeta victim ia wetem sam dish mo plet, ol samting blong kijin,” hem i talem.

“Mi ko kim long seven household ia we oli bin lusum haos blong olgeta long incident ia,” hem i talem.

Pastor Puneret i talem se mo wan missionary hem i bin kam in tu blong help wetem siks sleeping bag.

Plante long olgeta victim ia oli bin kam sikim shelda long Luganville Baptist Church afta we oli lusum haos blong olgeta mo oli bin kobak finis long Big Bay Bush.

Investikesen blong olgeta 14 suspended polis ofisa long Santo from alekesen blong polis brutaliti i stap kohed.

(Visited 1478 times, 1 visits today)

About The Author

You might be interested in