Ol Chines engineer blong wok long infrastructure projek

Wan jata flaet blong ol engineer blong China bae i kasem Port Vila long eli yia ia blong wok long ol infrastructure projek.

Minister blong Finance mo Economic Management, Johnny Koanapo, i talem se Kavman i kat strong tinktink blong mas pusum ol projek ia nomata long jalenj blong COVID-19.

Hemi talem se trifala projek ia hemi Presidential Palace, niu financial bilding mo extension blong Ministry blong Foreign Affairs bilding.

“Kavman i kivim risponsibiliti ia long Ministry blong Finance mo Economic Management wetem Ministry blong Infrastructure mo Public Utilities blong wok long ol aotstanding projek ia blong ol international kontracta we oli stap ovasi i wok long hem,” Minister Koanapo i talem.

“Bae oli kam wetem ol skil mo machinari tul blong olketa mo hemia nao ol step we Kavman i wantem mekem blong mekem se ol projek ia i hapen kwiktaem.”

Chief Executiv Ofisa blong State Ofis, Yan Dapang, i talem se hemi glad blong harem se bae projek blong niufala state haos bae i ko hed afta long graon break blong hem long yia 2016.

Hemi talem se kiln ap i stap tekem ples long olfala state haos long Joint Courtrady blong oli demolishim.

“Tinktink blong yumi bidim Presidential Palace ia hemi blong bildim bakeken integrity blong state haos,” Mr Dapang i talem.

“Bae hemi 1000 square mita blong ofis spes mo bae hemi bigwan olsem bilding blong National Convention Center wetem tu stori mo bae i kat wan gudfala view i ko long Port Vila haba.

“Nifala bilding bae hemi expandem wok blong mifala.”

Mr Dapang i talem se State Palace wetem Ministry blong Finance mo extension blong Foreign affairs hemi aroan VT2 billion Chines grant.

Hemi talem se Chines kampani we i winim kontract blong bilt hemi China Gezhouba Group No.2 Engineering Co Limited.

“Kampani ia hemi wan rank 115th aot long 500 state konstruction kampani blong China mo hemi bildim plante bigfala infrustructure long China inkludum ol bigfala damej,” Mr Dapang i talem.

“Kampani ia hemi jes finisim nomo wan projek long Nairobi hemia long Kenya, Africa mo hemi redi blong kam wok long Vanuatu.”

Minister Koanapo i talem se olfala Ministry blong Finance oli demolishim finis long yia 2019 redi blong konstraksen wok i ko hed long 2020 mbe from COVID-19 i mekem se i bin wok i bin stop smol.

Hemi talem se nara bigfala projek blong Kavman hemi bilding blong Justice Hall we hemi niufala court haos.

 

 

 

 

(Visited 194 times, 1 visits today)

About The Author

You might be interested in