Ol COVID kes long Solomons i stap ko antap yet

Ol health otoriti long Solomon Islands i ripotem 350 konfem kes blong COVID-19 long eli wik ia wetem moa kes i save ko antap.

Radio New Zealand i ripotem se 56 pipol wetem virus ia i admit long hospitol mbe data blong sik ia oli stap kolektem yet.

Wan Senior advisa long Solomon Islands health Ministry, Yogesh Choudry, i talem se i kat evidens blong widespread komuniti transmisen long capital Honiara, kolosap long Malaita Provins mo i save kat threat long West Provins.

“Namba blong ol pipol we oli test positiv hemi wan wok blong ol test kapasiti we i stanap long 200 test wan dei. I kat plante sampol we i stil stap yet blong analysem mo mifala i stap testem wan limit namba blong ol pipol.

“So namba blong ol kes bae i moa hae long wanem mifala i kat naoia,” Dr Choudry i talem.

Prime Minista blong Solomon Islands i anaonsem wan fo dei lokdaon long Honiara Emergency Zone.

Lok daon ia bae i efektiv stat tete long 6pm kasem long January 29 long wiken.

Prime Minista Sogavare i mekem diklaresen ia long adres blong hem long Monday wik ia.

Hemi explenem se lokdaon ia i blong help katem daon spread blong COVID-19 transmisen.

Prime Minista Sogavare i talem se bae oli lukluk long lokdaon ia sapos i nid blong extendem.

Kavman blong Solomon Islands i askem ol residen blong rispektem lokdaon ia mo stap kwaet long ol haos.

Prime Minista Sogavare i talem se ol kes ia i link daerek long ol pasenja mo crew we oli kasem Honiara long Ongong Java long January 10 2022 long ship Awka.

-RNZ/Solomon Islands Broadcasting Corporation-

 

 

(Visited 26 times, 1 visits today)

About The Author

You might be interested in