Ol eria administrator blong dil wetem foren vessel

Wan totol blong teti-tri eria administrator i save holem taet wan foren vessel o aircraft folem customs akt.

Director blong Customs Dipatmen, Harold Tarosa, i saenem ol apointmen blong ol eria administrator ia long wik ia folem illegal entri blong sam vessel i kam insaed long kantri long taem blong COVID lokdaon ia.

Ol otorise eria administrator ia i kat tri long Torba, six long Sanma, faev long Penama, eight long Malampa, six long shefa mo faev long Tafea.

Mr Tarosa i talem se wok blong ol eria administrator ia hemi blong ripotem eni ovasi ship o aircraft we i kam long solwora blong Vanuatu witaot permission blong kavman.

Mr Tarosa i mekem i klia se i kat provision long niu loa we i statem se dipatmen blong customs i save apointem ol niufala authorised customs ofisa.

Hem i talem se hem ia i minim se ol eria administrator ia oli save mekem wok olsem wan customs ofisa. Ol wok ia hem i oli save stopem mo kivim oda long wan foren vessel o aircraft we i stap entarem kantri we ol mein port blong entri i nosave long hem.

Hem i talem se ol eria administrator i save kol i kam long wan port blong entry o askem asistens long polis o custom long Port Vila taem oli stap mekem wok ia.

Director blong Local Authority, Leith Veremaito, i talem se wok ia bae i givim asurens long ol nara dipatmen se i kat oportuniti i stap blong wok wetem olgeta eria administrator blong dilivarem seves long ol pipol.

Hemi talem se Vanuatu bae i kat 41 yia long yia ia mo hemi gud blong taetem ap strong surveillance mo netwok blong Vanuatu tru long technology.

“Naoia we yumi stap toktok i kat nara 29 eria administrator we Public Service Commission bae i apointem olgeta,” hem i talem.

Director Veremaito i talem se i gat sam pipol we dipatmen bae i apointem olgeta we oli live long ol kostol eria long kantri blong save mekem wok ia tu olsem ol customs ofisa.

Kavman i plan blong apointem evri eria administrator blong mekem wok blong wan customs ofisa long ol difren eria kaonsel we oli lukaotem.

(Visited 188 times, 1 visits today)

About The Author

You might be interested in