Ol fama blong Torba i kwestenem dilei

Ol Torba fama long Tanna i wari se dilei blong kobak hom bae i afektem ol kakae we oli sud planem bak.

Sos ia we i no wantem nem blong hem i kamaot, i reisem harem nogud long VBTC Nius se hemi no festaem we oli pat long wan akrikalja sho afta oli dilei blong ko bak long Torba provins.

Hemi talem se hemi wan fama we hemi planem plante ol lokol yam ‘Wovele’ mo sapos hemi stap longtaem tumas long Tanna bae hemi mestem ol deit blong planem bak.

“Kavman i mas tinkbaot se mifala ia i mekem vatu long garen mo taem sho i en, oli sud putum mifala i kobak feswan,” Sos ia i talem.

“Yumi ol pipol yumi dipen bigwan long graon blong faenem mani.

“Taem akrikalja sho i en nomo long Friday, mifala i kat kwesten se bae mifala i kobak long wanem ship.

“Mifala i kam long ship MV Mahalia mo spendem fo naet long solwota; yumi mas tinkbaot se Torba i stap long not mo blong travel i ko lem bae i tekem longtaem.”

Sos ia i talem se oli bin arem se bae oli ko long Santo Star mbe afta oli se ship ia bae i tekem ol fama blong Shefa.

“Afta mifala arem oli se bae mifala i ko long Kiwi Trader ship mbe taem mifala i ko askem oli se bae i ko long Aneityum mo afta bae i tekem ol kokonat i ko long Erromango,” Sos ia i talem.

“Mifala i arem bakeken se bae mifala i ko long MV Kaliara mbe taem mifala tekem ol tink blong mifala blong ko bodem ship, arem oli talem se ship bae i kasem Sanma mo Malampa provins nomo.

“Hemia i no festaem, long las akrikalja sho long Vila, oli bin dileiem mifala blong wan manis mo mi mestem blong planem ol yam blong mi, mo i nogud evri wan.

“Taem Kavman i promotem lokol kakae plis i mas luksave se mifala i stap longwe.”

Director General blong Ministry blong Akrikalja, Moses Amos, i konfemem se bae MV Mahalia i tekem bak ol fama blong Torba i kobak folem shipping sabsidy we i stap vinis.

Mr Amos i talem se ship ia i tekem ol pipol we oli pat long rodeo sho mo taem i kobak bae i tekem ol fama ia.

“Taem MV Mahalia i kambak bae i tekem ol fama blong yumi long Torba i kobak mo i dipen long weta,” Mr Amos i talem.

Sos ia i talem se dilei ia i distembem ol skul pikinini tu long skul.

Hemi talem se oli yusum wan primari skul blong silip long hem.

“Mifala i rili enjoyem akrikalja wik ia wetem ol lokol prodak we mifala i bin tekem i kam olsem fowl, taro, dry breadfruit wetem ol natangura blong salem,” Sos ia i talem.

“Mbe kwesten blong oltaem dilei olsem, bae mifala i nosave se bae mifala i pat long nekis akrikalja sho long 2023.”

Weta Ofis i putum aot wan strong marine wind woning long ol solwota blong Vanuatu wetem saot saot east win blong 21 kasem 25 knots wetem raf solwota blong 2.5 mita.

Sos ia i talem tu sam fama blong Sanma tu i stap yet long Tanna.

 

 

 

(Visited 670 times, 1 visits today)

About The Author

You might be interested in