Ol fama long Sanma blong kasem kavman sabsidi

Ministry blong Agriculture, Livestock, Forestry, Fisheries mo Biosecurity hem i bin lojem long wik ia, Saeklon Harold Rikavari Prokram mo sabsidy blong ol fama, long Sanma Province.

Daerekta Jenerol blong Ministry blong Agriculture, Livestock, Forestry, Fisheries mo Bisosecurity, Moses Amos, i talem se rikavari prokram ia, bae hem i fokas plante long ol eria we saeklon i pas bigwan long hem.

Hem ia i stat long Westcoast Santo, i kam long Luganville mo East Santo mo ol smolsmol aelan blong Santo.

“Bae yumi wok wetem Sanma Provincial Kavman Kaonsel mo Nasonal Disasta Manejmen Ofis long Santo blong yumi putumaot ol help ia i ko kasem olgeta we Saeklon Harold i afektem olgeta,”
Mr Amos i talem.

Hem i talem se olsem pat blong rikavari prokram ia, Vanuatu Agriculture Research mo Technical Centre (VARTC) hem i bin distributum sins Novemba 2020, 18,844 sidling blong kakao i ko long ol fama stat long Nakere kasem Matantas, Portolry mo Jubilee Farm.

Daerekta Jenerol Amos i talem se i gat narafala 14,000 sidling i stap long VARTC yet blong distributum i ko long ol fama we saeklon i bin distroem kakao, kokonas mo ol narafala tri we oli gat.

Hem ia hem i help we kavman hem i provaedem tru long VARTC blong helpem ol fama blong oli save groem bak kakae blong provins ia.

Daerekta Jenerol Amos, i talem se, “Pat blong rikavari ia bae hem i kam wetem ol tul we bae i helpem yumi ol fama mbe bae yumi manejem long wan wei we, bae yumi save kontrolem blong mekem se yumi everiwan i mas gat risponsibiliti blong lukaotem ol tul ia we bae ministri i kivim.”

“Hem ia bae i nomo olsem bifo we yumi yusum mo sakem nomo i stap olsem mo taem saeklon i kilim yumi, yumi lukluk bak blong karem wan moa bakeken. Hem ia bae i nomo hapen.

“Bae yumi kodinetem long wan fasin we taem ministri i kivim tul i kam long yu, yumi mas gat risponsibliti blong lukaotem ol tul ia, blong mekem se taem saeklon hem i kilim yumi, bae yumi nomo wet mbe yumi karem ol tul ia mo planem bak kakae blong yumi,” Mr Amos i talem.

Hem i talem se prokram ia bae hem i stat long Westcoast Santo ko kasem Luganville mo Malo aelan.

“Prokram ia bae yumi rolemaot tru long ol teknikol dipatmen blong yumi we oli bes long Sanma Provins long Luganville, wetem help mo kodinesen blong Sanma Provincial Government mo ol ofisa blong NDMO we oli bes long Luganville,” Dareketa Jenerol Amos i talem.

Plante fama long Sanma Provins i bin kam long lonjing ia mo fulumap ol fom blong kasem sabsidy blong kavman, tru long ministri ia blong kavman i save helpem olgeta, blong pem 70 mo 60 per cent blong ol tul blong fam mo fishing blong olgeta.

Daerekta Jenerol Amos i talem se afta 40 yia blong Independens blong kantri ia, ol pipol i bin stap wokbaot wetem slip blong olgeta.

“Afta long 40 yia, yumi bin sakem mani blong yumi olbaot long ol sekta we hem i nosave strenktenem yumi taem we wan disasta i kasem yumi.

“Afta 40 yia, yumi foketem prodaktif sekta. Tankiu long COVID-19 we hem i kam blong wekemap yumi, blong yumi luksave pawa blong prodaktif sekta,” Daerekta Amos i talem.

Hem i talem se impak blong Saeklon Harold long provins ia hem i bin bigwan tumas.

Hem i talem se lojing ia long 11 February, hem i makem 361 dei afta we Saeklon Harold i pasem Sanma Provins long 6 April 2020.

Hem i talem se 361 dei ia hem i longtaem tumas blong rikavari respon, i kam in long Sanma afta long Saeklon mbe hem i kam blong soem risiliens blong ol man Sanma eventoh, saeklon ia i kam kilim ol ples mbe ol pipol blong Sanma i kirab mo wokabaot.

Hem i talem se ol pipol long Sanma i no stap mo wet from help i kam ovasi.

“And hem ia mi mas congratulatem ol pipol blong Sanma long risiliens blong yumi. Yumi no wet long man ovasi blong kam fitim yumi mbe yumi bakeken yumi kirap. Hem ia nao hem i tru mining blong Independens,” Daerekta Jenerol Amos i talem.

Ol fom blong kasem sabsidi blong kavman i stap long Ministry blong Agriculture Ofis long Santo tu, blong ol fama i save ko karem yet mo fulumap blong kasem sabsidi blong kavman ia.