Ol family i glad long riten blong ol kru

Ol famili blong olgeta kru long turis bot i hapi long riten blong olgeta.

Olgeta family memba ia i soem glad hat blong olgeta wetem wan welkam hom bana we oli stanap wetem long Tagabe Ranabaot blong welkamem ol kru memba ia.

I kat wan totol blong 126 Ni-Vanuatu kru we oli stap long turist bot mo oli kasem bak Port Vila long yestedei.

Hemi wan spesel airlift aot long Philippines i kam long Vanuatu olsem pat blong COVID-19 repatriation prokram blong kavman.

Olgeta Ni-Vanuatu kru ia oli stap long tri fala cruise ship ia we hemi Pacific Explorer, Pacific Dawn mo Pacific Aria. Long 27 March olgeta ship ia oli bin aot long Australia mo oli go stap long Manila Bay long Philippines from COVID-19 pandemic ia.

P&O Cruises hemi okanaesem wan spesel chata blong ol Ni-Vanuatu kru ia wetem ol Fijian kru memba.

Afta we olgeta kru ia oli kasem airport long Port Vila, oli ko tru long kwarantin kliarens mo customs kliarens vinis, oli ko long ol bus mo ko long kwarantin senta blong oli save spendem nekis 14 dei.

P&O local agency we hemi South Sea Services, hemi tekem tugeta ol famili mo frens blong ol kru memba ia long Tagabe Ranabaot long Port Vila, blong oli save kat janis blong welkamem bak olgeta kru ia.

VBTC hemi toktok wetem Manejing Daerekta blong South Sea Services, Carissa Jacobe mo hemi talem se hemi hapi blong luk ol kru oli kambak sef.

“Mi arem mi klad tumas. Mi harem gud mi glad long everiman we i stap wok had blong traem faenem wan wei blong olgeta i kambak, i no mi nomo. P&O i mekem bigfala wok blong olgeta, olgeta long NDMO, COVID-19 Advisory committee, boda kontrol, kwarantin, Bio Sekuriti mo Helt Dipatment,” Carissa Jacobe i talem.

President blong P&O Cruises Sture Myrmell, hemi talem “tankiu long Kavman blong Vanuatu we i save sapot blong mekem olgeta kru i kam home sef. Mo hemi talem se ol Ni-Vanuatu kru ia oli gat peisens mo oli andastanem blong wet long ol arenjmen we bae i tekem olgeta i kam hom.”

Mr Myrmell i talem se ol Ni-Vanuatu kru ia oli sef mo oli lukaotem gud olgeta long ship, mo oli hapi blong kambak hom blong luk ol famili blong olgeta.

Hemi talem tu se ol kru memba ia oli ol spesel memba blong P&O tim we oli stap insaed long ship from taem oli stap wet long repatriation, oli mekem spirit blong everi wan i stap antap blong wet long repatriation blong olgeta.

Taem arejmen i stap tekem taem P&O Cruises hemi komitim hem fulwan blong karem ol kru ia i kam hom sef.

P&O Cruises i talem se hemi gat wan taet rileisensip wetem Vanuatu mo talem tankiu long kavman blong save wok kolosap wetem olgeta blong karem bak ol kru ia i kam hom.

 

(Visited 44 times, 1 visits today)

You might be interested in