Ol fes yia scholarship studen i konsen long fi

Moa long 30 fes yia Kavman sponsorship studen i wari from dilei blong cos fi.

Ol studen ia oli ol Yr 13 skul pikinini blong 2020 we oli jes tekem ol niu kos long University blong South Pacific Emalus Campas long Port Vila long yia ia.

Jerox Wembus, wan long ol konsen studen, i talem se ol studen oli no hapi from due deit paymen blong ol cos fi hemi long tumoro Friday mbe i nokat eni paymen nomo we ol othoriti blong kaontri i mekem.

Hemi talem se taem i nokat paymen i afektem learning long skul.

“Tumoro hemi deit we evri paymen blong ol cos i sud ko mbe kwesten naoia se wanem nao ol othoriti i stap mekem,” Mr Wembus i talem.

“Plante studen oli wari naoia from oli kam long aelan mo oli spendem own mani blong kam stadi long town.

“Ol parents blong mifala bae oli nosave pem skul fi blong mifala nomo from hemi had tumas.

“Mifala i nidim wan ansa long ol othoriti.”

Wan nara studen we hemi cos tu blong festaem, Doddy Morris, i talem se oli no hapi nomo long wik ia.

“Hope we ol othoriti i bin kivim long mifala blong pem fi blong mifala i stadi mo kasem wan wok long futja, mi nosave se olsem wanm,” Mr Morris i talem.

“Hemi wan samting nating nomo we oli no akt folem.”

VBTC Nius i toktok long General Manager blong Vanuatu National Provident Fund, Parmod Archary, i talem se long ofisiol akrimen we Kavman i gat wetem olgeta, i statem i clia se bae ofis i lukluk nomo long ol studen we oli mekem degri prokram.

“Polisi i apruv nomo blong sapotem ol studen blong tertiary wan i ko antap mbe i no ol yr 13 studen we oli jes statem cos,” Mr Archary i talem.

“Ol tertiary qualification we yumi lukluk long hem, hemi ol kaen cos olsem plumbling.”

Director blong Tertiary Education long Ministry blong Education mo Training , Anne Rose Tjiobang, i askem ol studen we oli karem direct scholarship blong go sikim help long scholarship mbe i no long ofis blong Vanuatu National Provident Fund.