Ol fisherman i no glad long goodwill shea

Ol Memba blong Vanuatu Fisherman Association i no glad long shea blong goodwill peimen.

I no longtaem i pas, Kavman i bin givim wan goodwill mani blong VT10 million.

Olgeta fisherman ia oli bin serve anda long South Pacific Fishing Kampani mo oli bin traem plante taem blong kavman i pem entitlemen blong olgeta we oli klemem VT1.5 billion long ol wage we fishing kampani ia i no bin pem. Plante oli serve kolosap 20 yia i pas long ol fishing bot ovasi.

Tom Essical, wan memba blong Association i talem se hemi receivim wan shea blong VT10,000vt nomo mo i kat some nara memba we oli karem VT5,000 nomo.

Hemi talem hemia i no fea nating.

“Mifala i konfus from mifala i tekem ol difren kaen peimen mo nosave se from wanem mo hao nao mifala i kasem ol pei olsem,”Mr Essical i talem.

“Mani i sud shea equal long ol memba. Sapos wan memba i tekem VT 200,000 mbe evri wan i mas tekem semak amaon.”

Wan gel we i no nem blong hem i kamaot, i talem se papa blong hem i bin ko wok ovasi blong 11 yia mbe oli sek se hemi kat VT10,000.

Mbe Presiden blong Vanuatu Fisherman Association, James Kalate, i sakem aot ol toktok blong rod we i kamaot se hem mo komiti i ronwe wetem mani se i no tru.

“Mani ia Kavman i givim blong fifti fisherman nomo olsem Minista blong Finans(Honoroble Johnny Koanapo) i talem long mifala, now wetem heart we mifala executiv i kat, mi mas pem evri fisherman, so mekem se yumi shea long 130 fisherman, “Mr Kalate i talem.

“Ol toktok blong rod we i stap ko olbaot, plis ol komplen i mas kam stret blong mifala i luk.”

Association hemi sherem aot araon VT8 million long 130 fisherman, VT2 million komiti i plan blong yusum blong openem wan niu ofis. Long rikod we VBTC Nius i kasem i soem se sam fisherman i karem VT5,000, sam VT10,000 mo VT20,000.

Mr Kalate i kontinu blong talem se mane we kavman i kivim hemi no enaf blong ko long evri fisherman long kaontri.

Hemi talem se oli mas folem toktok blong kavman blong no mekem fisherman association i ded mbe mekem sam developmen.

Director General blong Finance mo Economic Management, August Letlet, i talem se mani ia hemi no wan entitolmen, from kleim blong olgeta we i ko long court i neva ko tru. Mbe peimen we kavman i kivim tete hemi wan goodwill paymen nomo.

(Visited 452 times, 1 visits today)

About The Author

You might be interested in