Ol graon long Luganville-No lease

Wan open diskasen long wik ia i harem se fulap pipol we oli liv long state graon long Luganville i nogat lease.

Deputy Prime Minista mo semtaem Minista blong Lands, Sato Kilman, i harem se fulap pipol tu we oli kat land lease oli no stap pem land rent blong olgeta.

Long wan open diskasen wetem ol pipol we oli liv long chapui eria mo Nichiku plantation long tete, kavman hemi asurem ol pipol se i save gat wan wei aot long ol isu blong graon we oli stap fesem sapos oli wok wetem Lands Dipatmen.

Minista Kilman i talem se tim we i kam daon i no blong ronem aot ol pipol long graon we oli stap long hem mbe hemi blong remindem olgeta se taem oli stap long state land, oli gat responsibiliti mo duty tu blong mas comply wetem.

Hemi talem se Pepes blong visit hemi blong tokbaot ol stret proses we i stap blong pipol i folem taem oli stap long graon we i stap olsem state land.

Minista Kilman i talem se wan long ol wok ia now blong mas folem proses blong karem lease blong graon we oli stap long hem mo taem oli gat lease oli mas pem land rent.

Hemi talem se ol proses ia bai i hapen long wan level we ol pipol long level blong ol grassroot oli andastanem.

“I kat wan toktok i stap ko raon se Kavman hemi kam blong tekem aot kraon; Santo hemi bigfala aelan olsem ol man i stap talem so mifala i kam blong luk se wanem stret ol problem,” Minista Kilman i talemaot.

Sam pipol oli fil se Lands Dipatemen i no advsiim gud olgeta long wanem blong mekem blong save karem ol land lease.

Kavmen hemi hop se ol proses ia bae i folem loa mo bai i save help tu blong growem economi.

Long land blong Nichiku plantation we kavman hemi wandem pem graon blong yusum long sam developmen we oli wandem.

Kavman hemi promesem ol pipol we oli liv long plesia blong muvum olgeta long wan narafala graon.

“Kavman tinktink blong hem blong stat pem graon long plesia i ko antap hemi on hold from yumi kat tumas dispute(raorao),” Director blong Lands long Luganville, Gorden Willie i talem.

“I mekem se visit blong minista ia hemi blong mekem sua se ples we yumi traem blong tekem blong pablik pepes bae i mas ko hed.

Wan plan blong Kavman long Nichiku plantation hemi blong putum hospital long plesia mo subdividem long ol pipol we oli interest long eria ia.

Ol pipol oli gat diskasen ia tu long presens blong Member blong Palemen blong Luganville Constituency, Matai Seremiah wetem Acting DG mo Director blong Lands.