Ol jif blong Penama i mekem kastom i ko long Kavman

Ol Jif blong Penama Provins i mekem kastom i ko long Kavman blong letem faev pipol blong Solomon Islands we oli bin flaot long solwota long eli yia ia i ko liv long komuniti blong Solomon Islands long Vanuatu.

Kastom seremoni ia i pat long selebresen blong makem nasonal dei blong olgeta jif long manis ia long Saralana Park hemia long Port Vila.

Presiden blong Solomon Islands komuniti, Lloyd Fikiasi, i talem tankiu long gudfala hospitaliti blong pipol blong Vanuatu we oli soem long faev pipol we oli bin flaot long solwota blong wan manis.

Hemi talem se hemia i no mistek we oli kam sho long Penama provins from provins ia i kat wan longtaem frensip wetem Solomon Islands.

“Mi wantem talem bigfala tankiu long kavman blong Vanuatu blong save lukaotem olgeta wantok,” Mr Fikiasi i talem.

“Spesel tankiu nao i ko long olgeta pipol blong Maewo aelan.

“Mo hemi God’s grace we oli kam nomo long graon blong ol wantok brata nomo.”

Deputy Prime Minista, Honoroble Ismael Kalsakau Maaukoro, i talem se olgeta pipol blong Temotu Province i stap long hand blong kavman blong Vanuatu kasem taem oli ko bak long Solomon Islands.

Hemi talem se kavman blong Vanuatu i askeptem kastom we ol jif i pefomem.

“Mo hemi asurem evriwan se bambae hemi tekem kea long ol wantok ia,” Mr Kalsakau i talem.

“Mi welkamem ol famili blong Solomon Islands ia long eria blong Vanuatu.

“Mi wantem talem tankiu bigwan tu long ol pipol blong Maewo we oli save tekem kea long olgeta.”

Mr Kalsakau i talem se i kat obsen blong putum bak ol pipol ia long Solomon Islands.

“Wan hemi lukluk long wan repatriation flaet,” hemi talem.

“Nambatu, RVS Tukoro i save handem olgeta long Auki Patrol bot blong Solomon Islands bitwin boda blong Vanuatu mo Solomon Islands.”