Ol kontrakta i atendem rod developmen trening

Twenti naen small scale kontrakta i atendem trening blong rod developmen long Vanuatu Institute blong Technology long August ia.

Olgeta 29 patisipent ia i gat tri woman.

Wan patisipen blong trening ia, Kerby Makwe blong Ambrym aelan, i talem gudfala rod akses i impoten long ples blong hem.

“Taem pipol i stap krae from rod, mifala bai i ripresentem olgeta blong ansarem nid blong olgeta tru long ol skil mo save we mifala i kam lanem,” Mr Makwe i talem.

“Bambae mifala i kobak long komuniti mo fokas blong bildim gud ol rod long komuniti.”

Australian Acting High Commissioner, Her Excellency Clemency Oliphant, i talem se Kavman blong Australia i stap help long developmen blong rod long Vanuatu.

Long 2009 i kam kasem tete, Australia i givim ova 6.8 billion vinis long Vanuatu blong helpem Dipatmen blong Public Works blong impruvum rod seves.

Her Excellency Ms Oliphant i serem glad heart blong hem long graduation blong ol small scale kontrakta ia.

“Mi wantem talem tankiu long yufala blong save kompletim trening ia blong save helpem kavman blong mentainem mo lukoutem gud ol rod blong Vanuatu,” Ms Oliphant i talem.

“Hemi gud tumas blong luk impak blong strong patnaship ia we yumi luk tete tru long wok tugeta. Australia hemi glad long patnaship ia we yumi wok tugeta long developmen blong rod. Ol rod ia i konektem ol komuniti tugeta, blong ko long maket mo blong karem mani blong helpem laef blong olgeta mo helpem ol pikinini blong ko long skul mo blong easy akses i ko long ol health senta.

Wan treina, Florian Carcasses, i talem se olgeta patisepen ia oli lanem plante samting blong oli save winim wan tender blong helpem road developmen long kaontri.

Area Administrator blong Saot West Malekula, Gerald Tamau, i stresem se akses blong gudfala rod i impoten from i helpem ol fama wetem ol lokol produs blong winim vatu mo kontribut long ekonomik.

Mr Tamau i talem se ol kava fama blong saot west Malekula i mas wokbaot 1 haoa wetem ol bigfala bag kava antap long hill i ko daon long solwota blong putum ol produs blong olgeta long ol ship port.

Mr Tamau, i talem se saot malekula i kat fulap fama wetem kava produs.

Antoine Malsungai, Communication Ofisa blong Ministry blong Infrastructure mo Public Utilities, i talem se kavman i stap wok long wan plan blong helpem ol fama naoia blong kat gudfala akses blong rod.

Hemi talem se saot west Malekula rod hemi stap long plan blong 2022.

“Long namba 10 March 2021, Ministry blong Infrastructure mo Public Utilities wetem Ministry blong Agriculture i lonjem wan plan akrimen blong help bidim ol gudfala rod blong ol fama long ol aelan,” Mr Malsungai i talem.

“Plan ia i blong helpem ol aelan we plante fama oli involv long sekta blong agrikalja.

“Yumi kat seven aelan we bae yumi wok wetem, i kat Santo, Malekula, Efate, Epi, Tanna, Erromango mo Pentecost.”

Minista blong Infrastructure mo Public Utilities, Honoroble Jay Ngwele, i talem se ol bigfala rod projek bae i hapen long Tanna, Ambae mo Pentecost long 2021 ia.

Minista Ngwele i konfemem hemia mo hemi talem se hemia nao ol prioriti rod projek mo ol fida rod long ol nara aelan oli stat rolaot finis.

Hemi talem se polisi blong kavman i talem klia se taem i gat gudfala rod i help impruvum laeflihud blong pipol long rural eria.

“China Civil Engineering Construction Corporation i stap mobilise vinis long Pentecost mo hop next manis wok i stat,” Minista Ngwele i talem.

“Director blong Pablik Works wetem ol technicol pipol oli ko long site i no longtaem mo oli mitim ol jif blong yumi long Pentecost blong kivim awenes long rod projek ia.

“Ating mi olsem minista konsen bae mi travel i ko long pentecost blong wok i save stat long ful aelan ia.

Minista Ngwele i talem se i kat namba tri stej blong rod projek we kavman i apropriatem long 2020, blong VT1 billion blong ol concrete rod long not, east, saot mo west blong Ambae.

Hemi talem se road long saot Tanna tu bae wok i ko hed wetem VT1 billion.

Trening blong ol small scale kontrakta ia dipatmen blong public works i mekem wetem sapot blong kavman blong Australia.

Hemi tekem olgeta tri wik blong ko long trening.

 

 

 

(Visited 337 times, 1 visits today)

About The Author

You might be interested in