Ol kontributa blong nasonal identity i askem kompensasen

Kavman i save kompensatem ol pipol we oli bin kontribut long nasonal identity blong Vanuatu.

Minister blong Internal Affairs, Ismael Kalsakau, i talem se, “Kavman i save helpem olgeta pipol we oli tink se kaontri i no bin luksave kontribusen blong olgeta.”

Hemi i talem se kavman i mas adresem ol eria we hemi ova lukim.

Hemi kamaot afta we ol mein man behaed long ol national identity oli raisem arem nogud blong olgeta, se from wanem Kavman i no save kompensatem olketa afta long 40 yia.

Iarawoi Rezel Samana we i kamap wetem motto blong Vanuatu i talem se kavman i neva luksave hadwok blong olketa kasem tete.

Hemi talem se, “Kavman i no bin tink hevi long mifala wan pis.”

“Nawia nomo yufala long media i jes kam blong mifala i explenem hao mifala i bin mekem ol nasonal identity blong Vanuatu mbe sapos no bae mifala i neva talemaot,” Mr Samana i talem.

Francois Aisev we i raetem national anthem blong Vanuatu i talem se, Kavman i bin kivim certificate blong recognisen long yia 1979 taem we hemi winim kompetisen blong raetem national anthem.

Hemi talem se, “Long taem oli kivim certificate ia wetem wan VT5000 mo taem ia i bin kat sam fanksen long Solwota Club mo mi ko usum vinis, mi kobak long haos.”

Long respon, Minister Kalsakau i talem se sapos olketa oli tink se kavman i no bin luk save olgeta i naf, oli shud toktok wetem kavman from kompensasen.

Hemi talem se Kavman i bin ova lukim nid blong ol pipol ia blong luksave olgeta.

“I kat sam pipol ia oli karem ol metal vinis mbe medal i wan samting we i ko stap slip long haos nomo mo oli nidim wan samting blong recognisen blong mekem se bambae oli save kat fulfilmit long laef blong olketa,” Minister Kalsakau i talem.

“Mbe sapos ol pipol ia oli kam luk Kavman, mi sua se se kavman bae i mas faenem wan ansa blong hem from mi wan we mi bilif strong se yumi mas tritem ol pipol long fea fasin wetem ol talen blong olgeta.

“Sapos wan talen i kivhan long Republic blong Vanuatu mo yumi stap benefit long hem tete, yumi no mas ova lukim from hemi kontribut long developmen blong kaontri.”

Ol national identity blong Vanuatu hemi national flag, coat of arms, national anthem, preamble mo nem ia Vanuatu.

 

(Visited 52 times, 1 visits today)

About The Author

You might be interested in