Ol lokol agent blong ol seasonal wokman blong New Zealand i wari

Wan popula agent blong ol Recognised Seasonal Employer i talem se hemi wari sapos ol wokman oli nomo wantem kobak wok long New Zealand.

Sylvie Kalmet, wan aproved agent blong ETM consultancies, i talem se presa blong faenem ol experiens wokman blong wok long ol fam ovasea mo shotej blong ol wokman hemi wan bigfala wari blong ol agent we oli stap rikruitum ol seasonal wokman blong ko wok long ol fam blong New Zealand.

“I kat araon 624 wokman vinis nem blong olketa i apruv blong oli kobak blong wok long manis ia mo nekis manis we hemi February, mbe bigfala kwesten i stap se weta ol wokman ia oli wantem kobak blong wok o no?

“Ol fama blong New Zealand oli wantem nomo ol wokman we oli bin pat long scheme blong Recognised Seasonal Employer from oli kat experiens.

“Wanem i hapen se ol nem blong ol wokman ia oli kam long New Zealand mo sapos wan wokman hemi disaed blong hemi no ko, bae i had bakeken long mifala ol agent blong faenem wan nara riplesmen kwiktaem from bae i tekem taem.”

Mrs Kalmet i talem Kavman blong New Zealand i wantem se mifala i kat ol risev o ol man we bae oli redi blong ko wok sapos ol wokman we oli bin pat long scheme ia vinis oli nomo wantem kobak wok long New Zealand.

“Long wik ia mifala i bin riplesem wan nara lokol blong tekem ples blong wan wokman from hemi nomo wantem kobak wok,” hemi talem.

“Fulap long ol seasonal wokman we oli bin ko wok long New Zealand oli kambak vinis long las yia mo oli stil wantem spendem taem wetem ol famili blong olketa.”

Wan nara agent, Anthony Christopher Quai, i talem se plante long ol wokman we hemi bin rikruitum olketa oli wantem tumas blong kobak wok mbe i nogat wan gudfala toktok i kam yet long fam owna.

Mr Quai i talem se naoia hemi stap tinktink blong faenem ol nara fam folem ol presa we hemi kasem long ol seasonal wokman blong oli ko wok ovasea.

VBTC news hemi lukim long social media se sam agent oli stap lukaotem ol wokman we oli kat gudfala experiens blong wok long ol fam ovasea.

Mrs Kalmet i talem se mein isu nao hemi from ol fam owna long Australia mo New Zealand oli wantem ol experiens wokman blong wok blong olketa.

Wan Recognised Seasonal Employer wokman blong Vanuatu, Steve Morris, we kontract blong hem i bin extend i talem se ” Nius we oli harem se plante wokman we oli pat long scheme ia taem oli kambak bae oli stap blong wan yia mo six manis kontrak mo hemia nao fulap oli nomo wantem kambak.”

Hemi talem se ol wokman ia oli bin spendem wan yia vinis long New Zealand mo taem oli kobak luk famili blong olketa oli fil se taem i shot tumas blong oli kambak mo stap nara yia bakeken.

” Folem isu blong COVID-19, plante wokman oli kambak long Vanuatu mbe mifala boss blong mifala i askem sapos mifala save stap blong kontinu karemaot wok blong helpem ol fama,” Mr Morris i talem.

“Sapos mifala evri wan i kambak bae i nokat man i wok mo longtaem ia mifala i akri blong stap blong helpem ol famili long Vanuatu mo tu growem ekonomim blong New Zealand.”

Long manis January ia, bae hemi wan yia mo six manis we Mr Morris i stap wok long New Zealand yet.