Ol Not weaver mo designa i mekem mani

Wan niu fom bisnis i stap jensem laef blong plante woman long Luganville mo Malo aelan.

Sanma Creative Industry Community Company i stap sapotem asosiasen blong ol woman we oli stap weave mo ol designa blong promotem mo maketem prodak blong olgeta lokoli mo international.

Acting Manager blong kampani ia, Janet Sine, i talem se ol memba oli stap winim gud vatu, mekem se laef i isi long olgeta blong pem skul fi mo mitim ol daili kost laef.

“Fulap long ol woman ia oli no bin skul gud o even drim blong witdroem mani aot long wan ATM masin,” Mrs Sine i talem.

Hemi talem se ol woman ia i stap tekem plante strong tinktink long sakses blong olgeta.

“Plante long olgeta i stap laf naoia taem oli yusum ATM masin blong festaem blong tekemaot mani,” Hemi talem long VBTC Nius.

Mrs Sine i talem se naoia we ol woman ia i memba long kampani, oli pat long economi blong Vanuatu.

Kampani ia i produsum mo salem ol prodak olsem ol hat kasem ol klos mo ol prodak we oli weavem.

Long Novemba 2020 nomo, kampani ia i expotem 150 hat i ko long wan paya long New Zealand; mo long yia ia oli bin salem 50 hat i ko long wan paya long Sydney, Australia.

Mrs Sine i talem se taem we kampani i stap salem gud ol prodak lokoli mo ovasi, COVID-19 ristriksen i mekem expot sale i ko daon.

“Yumi hop se taem evri samting i kobak nomol, ol expot i inkris bakeken,” Hemi talem.

Long wik ia, tri memba blong ol kampani bae i atendem mo i patisipet long Sista Fashion Show long Port Vila hemia long 23 mo 24 September. Plante long ol prodak bae oli soem long taem blong sho.

Fom long 2020 the Sanma Creative Industry Community Company i set ap long tri asosiasen, Malo Bosahe Sector One Women’s Handicraft Association we i bin stap expotem ol hat sins 2016, mo  Limabulu Headwear Association, wetem Luganville Clothing, Fashion and Textile Association.

Kampani ia i tekem sapot long Vanuatu Skills Partnership – wan join venja bitwin Kavman blong Australia mo Vanuatu.