Ol pipol i mas tink hevi long independence selebresen

Wan founding papa blong Vanuatu independence i talem se ol pipol i no sud tekem independence olsem nating nomo.

Pastor Sethy Regenvanu i talem se strakol we oli bin ko tru long hem blong kasem independence blong Vanuatu, hem i bin wan had wan from laef blong olgeta i bin stap long denja.

Pastor Regenvanu we i bin presentem fes draf blong stampa tingting blong mama loa blong kantri [preamble], i talem se tru long Independence pipol blong Vanuatu i save kasem fridom tete mo oli save kat ol samting we oli no bin kat bifo.

“Yufala we i gro ap afta long independence, yufala i tekem independence selebresen for granted mbe mifala we i gro ap bifo independence, mifala i strakol mo tru long hem ia mifala i luk se independence i givim ol samting ia long yumi,” Pastor Regenvanu i talem.

Pastor Regenvanu i praod tumas long strakol ia mo kol long ol pipol blong Vanuatu blong serem pride ia.

“Mi wantem advaesem ol pipol blong Republic blong Vanuatu blong plis andastanem histri blong kaontri ia.”

Hem i talem se sapos ol pipol i tink natink long independence, i minim se oli no kea tu blong save hu nao olgeta.

Mr Regenvanu i talem se taem yu save hu nao yu, yu luksave se everi pipol blong Vanuatu i save mekem wan kontribusen blong bildim kaontri ia.

Hemi talem se sapos hemi wan smol kontribusen mbe hemia i valiu ia.

“Sapos yu wan journalis mo mi wan pastor, wanem samting yumi tu i kat hemi i wan impoten componen blong mekem  ap Vanuatu mo mekem use long hem from yu save lusum janis blong yu.

“Janis we yumi kat everidei hemi difren, yusum gud mo kaontri ia i save kam wan nesen we ol nara pipol aotsaed long Vanuatu i save len long hem mo everi wan bae i filim olsem ol useful citizen mo hemia nao yumi wantem lukim.”

Pastor Regenvanu i talem se “Yumi mas save histri blong Vanuatu fastaem bifo yumi lanem wan foren histri.”

Hemi talem se sapos yu lanem histri blong yu bae i helpem yu plante blong save histri blong nara ples .

“I olsem lanwis, sapos yu wantem lanem English o French u stat wetem own lanwis blong yu mo bae i helpem yu blong andastanem.

“Hemi very impoten blong ol skul i tijim plante histri blong Vanuatu, i kat plante buk blong Vanuatu histri we yumi save yusum.”

Mr Regenvanu i talem se famli blong hem i bin ko tru long plante denja bifo long independence taem oli stap strakol blong Vanuatu i mas kat independence.

Hem i talem se haos blong hem i no sef long taem ia, from hem i stap olsem taket blong ol pipol we i ko akensem independence.

“Mi save talem se mi glad from mi ko tru long ol experians ia from mi save se i kat wan gudfala samting bihaen long hem.

“Taem u faet from wan gudfala samting, denja hemi minim nating nomo.”

Pastor Sethy Regenvanu hemi bin wan politician long Vanuatu, hemi bin wan Deputy Prime Minister blong 11 yia, mo hemi bin wan Minister blong Education, Youth mo Sport long 1988.

(Visited 288 times, 1 visits today)

About The Author

You might be interested in