Ol seasonal wokman long Queensland i no hapi

Ol Seasonal Wokman blong we oli pat long Seasonal Workers Program long Queensland, Australia, i kleim se oli no mekem vatu from farm we oli wok long hem i stap rafem olgeta.

Olgeta seasonal wokman ia i mit wetem Lawyer blong Bundaberg(Wan town long Coast Queensland), Stuart Levit, mo sherem ol arem nogud blong olgeta we hemi biliv se i mas kat aksen i ko akensem sam bigfala farm long Australia.

“Mifala i bin involv long sam nara kes mbe mi luk hem ia i moa nogud,”Mr Levit i talem.

“Sam long ol seasonal wokman ia, oli ol bigman, oli 40-50 yia mo oli tritim olgeta olsem oli ol slave long graon blong yumi.

Olgeta seasonal wokman ia we oli no wantaem nem blong olgeta i kamaot i talem se e had blong sendem mani long ol famili bak long Vanuatu from mani we oli mekem i smol tumas.

Wan Seasonal wokman we nem blong hem, Willie, i talem se oli mekem araon VT10,000 long wan wik mo didaksen blong ol cost blong transpot mo ples we oli silip long hem mo i mekem se oli kat VT7,000.

“Long en blong dei, yu nokat enaf mani blong stap wetem yu,”Mr Willie i talem.

“Taem long naet, mi nosave silip from sting bili i stap long bed we mi silip long hem. 1 kasem 3am

Commissioner blong Labour, Muriel Metsan Meltenoven i talem se i kat plante isu olsem i stap kam long dipatmen mo oli stap riferem i kobak long sapot faciliti long Australia.

Mrs Meltenoven i talem se olgeta ia nao bambae oli dil wetem ol welfare isu ia folem agrimen we i stap bitwin Vanuatu mo Australia.

“Mi enkarejem ol wokman nomo se sapos oli kat eni isu, oli toktok wetem ol sapot seves blong Australia we i stap vinis,” Mrs Meltenoven i talem.

“Mo sapos i no wok aot, yumi putum wetem ol staff blong yumi long Labour dipatmen mo bae mifala i toktok wetem Vanuatu High Commissioner long Canberra. Mo mifala i stap wok had blong labour attache i apoint ariap blong ko wok long Australia blong dil wetem ol isu ia.

Mrs Meltenoven i talem se wetem plante komplen we i stap kam, hemi biliv se sapos kavman blong Australia i givim taem blong Vanuatu i diskasem ol agrimen we i stap vinis, bambae Vanuatu i putum ol stret wei blong tufala kaontri i folem blong solvem eni futja komplen blong wokman.

 

(Visited 1744 times, 1 visits today)

About The Author

You might be interested in