Ol ship owna i mas luk se ol ship i sef

Ofis blong Maritime Regulator i kol long ol owna blong ol ship blong mas putum ol ship blong olgeta long ol sef eria long taem blong saeklon.

Maritime Regulator, Hickson Siba, i talem se ol owna blong ol ship oli risponsibol long damej we saeklon bae i kosem long ship blong olgeta sapos oli no folem advaes.

Hemi talem se Vanuatu i stap long saeklon sesen blong hem mo hemi impoten blong harem save advaes.

“Mi stap apil long ol ship owna blong faenem ol sef ples we bambae oli save haetem ol ship blong olketa long hem, from bae hemi stap sef inkes saeklon hemi muv i kam insaed long Vanuatu,” Mr Siba i talem.

“Yumi nosave pridiktem muvmen blong wan saeklon, mbe yumi bin lanem lesen long saeklon Pam mo Harold mo mi wantem se ol ship oli mas stap long sef ples.

“Taem ofis blong meteo i kivim woning blong no sail long solwota from rabis weta, hemi min se ol ship o ol smol banana bot i no mas mekem seves.”

Mr Siba i askem ol ship owna, ol captain mo ol krew blong oli folem advaes we i kam long taem blong saeklon.

“Long taem we yumi stap ko from we hemi festiv sesen, yumi askem tu ol ship mo smol banana bot owna blong mas tekem stret namba blong ol pasenja we oli sapos blong tekem mbe i no ova,” hemi talem.

“Resen from sefti blong ol pipol mo ol crew tu oli mas rispektem ol pasenja oltaem taem oli travel long ship mo ol banana bot.

“I mas gat ol sefti equipmen long ship mo ol crew oli no mas drink alcohol o kava taem oli stap wok.”

Mr Siba i mekem toktok ia folem bigfala namba blong ol pipol we oli stap travel i ko long ol aelan blong spendem xmas mo niu yia laved wetem ol famili mo ol fren.

 

 

(Visited 264 times, 1 visits today)

About The Author

You might be interested in