Ol suspek blong Big Bay Bush i stap long rimand

Sanma Police Patrol long Luganville i askem pipol blong oli stap kwaet mo alawem investikesen blong polis brutality i ko hed blong faenem jastis.

Internal investikesen blong polis brutality long Santo i stap kohed vinis.

Polis Komisina i bin putum tufala investigata i ko long Luganville blong mekem investikesen ia long Luganville polis.

Commander Chief Inspector long Sanma Police Patrol, Rexton Langon, hem i mekem kol blong everiwan i remain calm mo alawem blong investikesen hem i ko hed blong faenem jastis ova long ol kes ia.

Mr Langon, i talem se, “Mbe polising hem i no stop, polis bae hem i kontinu blong mekem aweanes raon long ol komuniti blong yumi long Luganville konsenem ol difren kraem.”

“Be long kwesten abaot polis aksen, asurens ia nao, loa hem i blong yumi everiwan. Polis Akt tu hem i provaedem ol aksen olsem sapos eni ofisa hem i ko biyon long ol pawa we i stap, bae oli suali fesem ol konsikwenses blong hem,” Mr Langon i talem.

Deputi Praem Minista mo Minista blong Internal Affairs we i lukaotem polis, Alatoi Ishmael Kalsakau, i talem se sapos i gat eni evidens blong polis brutality bae oli dil wetem folem niufala jenis blong polis akt long saed blong intentional assault, we wan polis ofisa i komitim taem hem i stap long duti.

Long saed blong olgeta suspek we sam Luganville Polis Ofisa i bin arestem olgeta, long Big Bay Bush, Magistrate Court long Santo i rimandem yestete finis 16 suspek ia, from ol posibol jajes blong unlawful assembly, assault, riot, theft mo obstructing police officers.

Commander Chief Inspector Langon, i talem se Magistrate Court i kivim 14 dei blong polis i finisim off investikesen long ol posibol jajes ia.

Mo kot bae hem i sidaon bakeken long 9 July from was Preliminary Inquiry blong kes ia.

Hem i talem se long olgeta 16 suspek ia, wan ia nao hem i pasta we i gat allegation se sam polis long Luganville i bin kilim nogud hem long taem blong ares.

I gat wan jif tu mo sam moa yangfala we oli pat insaed long ripot we hem i stap akensem olgeta.

Sanma Police Patrol i bin talem se i gat allegation se olgeta suspek ia, oli bin bonem daon eight haos mo blokem rod akses blong ol victim from isu blong graon.

Oli even kilim ded ol animol tu blong ol victim.

Mo taem we ol polis long Luganville i ko blong stabilisem situasen mo putum pis mo oda, long Fraedei, 19 June, ol suspek ia i faet bak wetem spia, knife mo ston.

So polis i yusum fos mo arestem sam long olgeta long taem ia.

(Visited 3882 times, 1 visits today)

About The Author

You might be interested in