Ol victim blong landslide long Maewo i stil wet long help

Ol pipol blong Maewo i kwestenem dilei long help afta long bigfala flood mo landslide long Maewo long August.

Senior Lab Ofisa long Livestock Department, Kaltuk Kalomor, i talem se landslide mo flooding we i distroem plante hom mo karen long aelan ia mo kasem tete ol pipol i no kasem help yet.

“I no bin kat wan kwik rapid asesmen i hapen long level blong area administrator mo ofis blong disasta long aelan ia,” Mr Kalomor i talem taem hemi bin ko stap mekem wok long aelan ia.

“Wanem we mi bin luk hemi rili sad mbe kasem tete ol pipol i stil wet long help yet.

“Hemi longtaem nao we i nokat wan respon, mo ol pipol i bin pem wan 25 kilo rice long wan ship we i bin kam pas long Maewo blong holem taet olketa wael oli digim graon bakeken blong digim aot kakae we landslide i bin berem mo flood i bin wasem daon.”

National Disaster Management Ofis Provincial Liason Ofisa, Philip Meto, i talem se rapid asesmen we Mr Kaltuk i mekem i ko long National Disaster Ofis, oli bin putum i ko bak long Penama Provincial Government blong dil wetem.

Secretary General blong Penama Province, Kelly Tabi, i talem long VBTC se dilei blong respon hemi from felia blong area council blong talem long provins kwik taem wanem i bin hapen long taem blong disasta ia.

Hemi talem se blong folem stret proses we i stap, eria council long aelan hemi mas letem provins i save long situasen ia bifo oli save askem help long National Disaster Management Ofis long Port Vila.

“Long wik ia bae mifala i sitaon mo dikas long hem,” Mr Tabi i talem.

“Komuniti bae hemi lukluk fastaem sapos hemi save sapot. Hemia ol eria council nao i kam insaed tru long ol comuniti disasta codinesen we oli set ap mo oli luk long level blong olketa se oli save mekem respons ia mbe sapos nogat bae ol key cluster we oli stap long provins bae oli kam in blong respond.

“Mo sapos provins i nosave mekem, taem ia nao ofis blong disasta i kam insaed blong respon olsem long taem blong Saeklon Harold.”

Hemi kolosap tu manis nao sins disasta blong flood mo landslide i hapen.

 

 

(Visited 22 times, 1 visits today)

About The Author

You might be interested in