Ol wokman i mas ripotem eni isu wetem stimulus pakej

Ol wokman i mas ripotem eni isu we oli gat wetem ol boss blong olgeta kosenem stimulus pakej long Laba Dipatmen.

Laba Komisina, Murielle Metsan Meltenoven i mekem apil i ko long ol wokman blong kam fowod mo reisem isu blong olgeta.

“Mi stap apil bakeken i ko long eni employee we hem i bin afekted long COVID-19 we boss hem i putumaot hem long ples blong wok.

“Sapos yu tink se yu no bin eligible blong risivim stimulus pakej ia o boss blong yu hem i bin kiaman long yu, plis kam fowod long labour blong ripotem ol isu olsem ia blong mifala i save dil wetem employer blong eksplenem elijibiliti kraeteria blong ol wokman we oli mas mitim blong save risivim stimulus pakej,” Ms Meltenoven i talem.

Komisina Meltenoven, i talem se oli bin sumonem ol employer mo ol wokman folem ol komplen we oli bin risivim mo eksplenem raet blong ol wokman long pakej ia mo hamas oli sud risivim.

Hem i talem se plante aweanes hemi kamout finis long media mo dipatmen hemi sendem out ol daerektif finis i ko long ol bisnis haus abaot stimulus pakej ia.

Ms Meltenoven i talem se sapos kavman hemi stap lukluk blong extendem stimulus pakej, bai hemi mas konsidarem wan nara wei blong mekem i isi blong ol wokman i save kasem stimulus pakej ia.

Ms Meltenoven i talem se “sapos Finance Dipatmen i save lukluk long wan narafala proses blong mekem laef blong ol wokman hem i isi mo tu bae hem i helpem Laba Dipatmen blong yumi no mas stap risivim tumas komplen blong ol wokman wetem ol boss.”

“Mbe Laba Dipatment hem i olwes stap blong asistim ol emploia wetem ol wokman long kritikol taem we yumi stap ko tru long hem naoia blong provaedem advaes mo darektif long aksesibiliti o elijibiliti blong stimulus pakej,” hem i talem.

Stimulus Pakej blong ol wokman we oli bin lusum wok from COVID-19 bae hem i en long June.

Mbae i save gat extension sapos Council blong ol Minista i apruvum.

(Visited 105 times, 1 visits today)

About The Author

You might be interested in