Namba tri repatriation blong ol Vanuatu citizens

Wan totol blong 126 Vanuatu citizens we oli stap wok long cruise ship bae oli kasem bak kaontri long tedei aftenun long namba tri repatriation.

Namba tri repatriation ia bae i karem bak olgeta Vanuatu kru we oli stap long cruise ship long Philippines.

Daerekta blong Dipatmen blong Foren Afea, Yvon Basil i konfemem wetem VBTC se P&O Cruise i okanaesem flaet ia, mo bae i kasem kaontri long tedei aftenun.

Mr Basil i talem se i kat 126 kru everiwan we bae oli kam long flaet ia.

“Wan plen blong Air Niugini bae i flaem olgeta long Philipines wetem ol kru blong Fiji mo bae i lego fastaem ol kru blong Fiji long Nadi. Afta  bae i flae i kam long Noumea long New Caledonia.”

Mr Basil i talem se plen blong Air Niugini ia hemi wan A330 plen mo bae i no save flae i kam long Port Vila, mekem se ol kru blong Vanuatu bae oli bordem nara plen blong Air Caledonie long Noumea mo flae i kam long Vanuatu.

Daerekta Basil i talem se folem ol mesa blong COVID-19, bae ol kru ia oli spendem tu wiks long kwarentin.

(Visited 549 times, 1 visits today)

You might be interested in