Ombudsman search warrant i no folem loa

Supreme Court blong Vanuatu i diklerem search warrant we Ombudsman i karem akensem Director General blong Finans i no folem loa.

Jastis Andree Wiltens i talem long jajmen blong hem long judisol review long keis namba 3169-2021 se search warrant we Magistrate Court i kivim i ko akensem seksen 24(1) blong Ombudsman Act.

Hemi kohed blong talem se anda long loa blong Ombudsman hemi sapos blong aplae from search warrant long Supreme Court mbe i no long Magistrate Court.

Hemi talem se entry, search, sisim, rimuvum blong ol dokumen mo nara material blong Mr Letlet hemi no folem loa.

Jaj Wiltens i odarem Ombudsman blong ritenem bak ol propeti we hemi karem long taem blong search warrant.

Long manis June yia ia Ombudsman i karem waren ia blong sejem haos blong Director General blong Finance mo Economic Management, August Letlet, Ofis blong hem long Ministry blong Finance mo Economic Management mo long Vanuatu National Provident Fund.

Mr Letlet, i talem long VBTC Nius se hemi sapraes blong luk Ombudsman mo ol legal ofisa blong hem i no andastanem akt blong impoten ofis we oli wok long hem.

Mo hemi welkamem desisen blong kot ia.

“Mi bin expektem mo mi tankful so wanem we mi wantem talem blong Media i mas save se nomata long ol loa we ol difren otoriti i administarem, hemi no oltaem neseseri se wanem oli stap mekem oltaem hemi tru mo raet,”Mr Letlet i talem.

“Yumi kat evri legal means blong yumi mas askem blong mekem se disisen hemi fea.

“So wanem Ombudsman Ofis hemi askem, mi stap askem imuniti long seksen 41 long act blong hem mbe long aplikesen blong mi, mi no askem kleim long damej.

“Hemi wan difren aplikesen we bae mi sabmitim i ko long court blong kleimem damej.”

Ofis blong Ombudsman i talem se keis ia i no klos mo investigesen i stap kohed yet kasem wok ia i finis.