Online scam i kam antap bigwan

Vanuatu Polis Fos i talem se hemi risivim finis fulap infomeisen long scam we hemi involvem ol Ni-Vanuatu long las tu yia.

Ofis blong Vanuatu Polis Fos i talem se ol infomeisen ia, oli risivim tru long Financial Intelligence Unit.

Fulap long ol scam ia, ol local pipol oli involf long hem tru long sosol media.

Polis i faenem aot se ol pipol oli pem bigfala mani i ko long ol kampani we oli mekem kiaman promes blong sendem ol samting olsem sumsung award, mo ol jewelleries.

Vanuatu Polis Fos i talem se plante long ol peimen, ol pipol oli mekem tru long bank, Western Union mo tu ol local kontak we oli stap long Vanuatu mo stap kolektem mani.

Polis i askem long ol pipol we oli involf long ol aktiviti olsem, blong mas kam fowod blong putum wan komplen, blong save stopem ol kaen aktiviti olsem.

Polis i talem se ol komplen ia, i mas kasem Money Laundering Unit blong mekem moa investikeisen long hem.