Oposisen i kwestem niu posisen long labour

Oposisen i talem se jenis long Trade Dispute Act bae i kostem Labour Ofis bigfala mani.

Jenis long act ia hemi blong putum wan adjudicator olsem wan niufala posisen we bae i stap long Labour ofis.

Niufala jenis ia i pas long Palamen long wik ia.

Mbe Lida blong Oposisen, Ralph Regenvanu i askem Kavman blong gat mo consultation long niufala jenis ia.

Wok blong adjudicator ia hemi blong lukluk long ol dispute we i hapen bitwin wan wokman mo emploia.

Palamen i amendem tu se everi dispute bae i pas tru long Labour Commisioner bifo i go long adjudicator.

Mr Regenvanu i askem kavman se mani blong pem niufala posisen ia bae i kamaot anda long wanem budjet.

Hemi askem tu se lukaot posisen ia bae hemi distebem financial ran blong Labour Ofis.

“Dipatmen blong Labour i gat budget blong hem. Wij budget hed nao bae yumi karemaot mani blong pem man ia? Mr Regenvanu i askem.

“Bae hem i wan bigfala mani ia. Wij budget hed insaed long Dipatmen blong Labour bae yumi karemaot mani ia long hem mo wanem wok nao existing budget hed hem i stap fandem we bae hem i safa olsem wan risal?’’

Jenis ia i talem se ol dispute long tufala pati bae Comissioner nomo i dil wetem bifo i tekem i go long adjudicator.

Mbe Lida blong Oposisen i talem se hem ia bae i wan bigfala beden bakeken long Labour Commissioner. Wanem bae hapen sapos hem i travel aot o i sik?

Deputi Praem Minista, mo Minista blong Internal Afea, Alatoi Ishmael Kalsakau i talem se kavman hemi responsibol long kos blong eni jenis long act.

Hem i talem se wetem niufala posisen blong adjudicator ia bae hemi risolvem kwik taem ol isiu we i stap afektem ol wokman tede.

“Long taem vinis i kam, pipol blong yumi oli stap fas wetem ol isiu blong ol emploimen blong olgeta, hem i expensif blong bambae oli stap pem ol loia blong ko long kot,” Mr Kalsakau i talem.

“Be taem oli ko daon long Labour Dipatmen, ol kes blong olgeta i stak long taem tumas. I gat bigfala load blong ol issues plante long ol kampani oli yusum ol loia blong olgeta nomo blong harasem ol wokman blong Vanuatu blong mekem se kes i no kasem kot.

“Mbe taem kes i kasem kot oli pulpulum taem blong oli risolvem mo from se ol smolsmol wokman blong Vanuatu i nogat enaf mani ten oli ronwe long ol kes blong olgeta,” Deputi Praem Minista Kalsakau i talem.

Niufala posisen ia hemi blong faev yia contrak mo Judicial Seves Komisen nao bae hemi jusum folem rekomendesen we i kam long minista responsibol.

(Visited 265 times, 1 visits today)

You might be interested in