Oposisen i kwestenem jenis long Polis Comisen apoinmen

Oposisen i kwestenem ol jenis long loa we i lukluk long ol apoinmen blong ol memba blong Polis Seves Comisen.

Amendmen we Palamen i bin pasem long las wik i talem se Minista blong Internal Affairs olsem minista we i lukaotem polis, hem nao bae hem i apointem everi memba blong Polis Seves Comisen mo tri long olgeta memba ia bae oli mas be ol ritae polis ofisa.

Long privias Police Akt 1980, hem i alawem nomo blong Minista responsibol long polis i mekem apointmen blong wan memba nomo blong comisen. Mbe ol narafala apointmen bambae Praem Minista, Minista blong Jastis, Jif Jastis mo Pablik Seves Comisen nao bae oli mekem.

Foma Deputi Praem Minista mo Memba blong Palamen blong Tanna Constituensi naoia, Jotham Napat i kwestenem disisen blong kavman blong mekem jenis ia blong alawem minista blong i apointem everi memba blong comisen.

“Bifo long [Polis] Akt i gat plante institution we oli apointem ol memba blong komisen blong oli save ko insaed long polis komisen,” MP Napat i talem.

“Amenmen we kavman hem i pasem, hem i quite controversial, taem we yumi tokbaot gud kavenans, transparensi mo acountabiliti hem ia hem i wan mas long eni kavman blong dei blong hem i promotem.

“Mo taem we mi stap mekem ol komen long bill ia we curent amenmen hem i blong Minista blong Internal Affairs, hem nao bae hem i apointem tri nominees olsem ol ritae polis ofisa blong ko insaed long komisen. Hem ia bae i imbosem risk taem yumi stap alawem minista hem i stap blong mekem ol apoinmen,” hem i talem.

Hem i talem se hem ia hem i konsen blong hem mo blong opposition tu we oli bin reisem insaed long palamen tat hem i beta blong maintenem wanem we hem i stap long criteria blong appointem ol polis ofisa ia mbe yumi save alawem ol difren agency, olsem Malvatumauri, Praem Minista Ofis, Minista blong Jastis oli save mekem apoinmen blong olgeta tu.

Hem talem se blong gat minista nomo i mekem apoinmen hem ia i save gat ol consequences blong hem long tumoro.

“Taem we yu gat wan minista we hem i ko sidaon long jea ia mo hem i stat blong gat political interference long apoinmen blong komisen. Taem we yumi stat blong pleiplei long national securiti blong yumi, yumi save imposem not just risk nomo long kaontri be internationali tu,” MP Napat i talem.

MP Napat hemi kwestenem tu gud kavenans, transparensi mo accountabiliti ova long ol apointment olsem.

Jotham Napat, i talem se Oposisen Grup i no agri long ol nara jenis we kavman i mekem folem apointment we bae wan minista i responsibol long hem.

Deputi Praem Minista we hemi responsibol long polis, Alatoi Ishmae Kalsakau i talem se jenis ia hemi folem polisi blong Gavman blong tede.

“May be wan bambae hem i tinkse hem ia bambae hem i save open long abuse be criteria blong apoinmen ia hem i mas be wan pesen we hem i kwalifae.

“Hem i mas be wan foma polis ofisa we hem i ritae afta we hem i kasem 55 yia blong hem, blong bambae hem i save sidaon long bodi ia.”

Folem polis akt, long pas apoinmen, Praem Minista, Minista responsibol long Polis, Jif Jastis, Chairman blong Public Seves Comisen mo Minista blong Internal Affairs nao oli stap appointem ol memba blong komisen.

Palamen i pasem tu se sapos wan memba blong fos i asoltem nogud wan man, mo sapos i gat wan fomal complain, ofisa i gat 14 days blong respon long alegation akensem hem.

Sapos memba blong fos i fail blong respon, bae oli dismisim hem long duti.

Bill blong polis i stap olsem las bill we oli bin debatem long fes ordinary sitting blong Palamen long las wik.

(Visited 1715 times, 1 visits today)

You might be interested in