Saspensen blong tu Memba blong Palemen

Speaker blong Palemen i saspendem Lida blong Kavman bisnis wetem Kavman whip long Palemen sitting from tufala i askem kavman saed blong muv aot long Palemen jemba long tu sitting.

Disisen ia, Honoroble Gracia Shadrack, anda long standing oda blong Palemen we i kivim paoa long hem from tufala Memba blong Palemen ia i askem blong kavman saed i muvaot long Palemen jamba long Tuesday mo Wednesday.

Nara resen hemi from tufala Memba blong Palemen i putum mosen blong aotem speaker blong Palemen, Mr Shadrack.

“Folem distebens blong Palemen, mi stap nao askem Lida blong kavman bisnis wetem kavman whip blong yutufala i livim haos ia,” Mr Shadrack i talem long Palemen.

Afta long smol brek, mo toksore Speaker blong Palemen i alaowem tufala bakeken folem rikwest blong Prime Minista, Honoroble Bob Loughman.

Opposition i bin kol blong Kavman i no tekem ol entitolmen blong Palemen Sitting blong eli wik ia.

Lida blong Opposition, Honoroble Ralph Regenvanu, i talem long Palemen sitting long Wednesday aftanun se hemi wan waste blong tax payers.

Long wik ia Kavman i wokaot long Palemen tu taem.

Mr Regenvanu i askem Speaker blong Palemen blong Palemen, Honoroble Shadrack, blong lukluk serious long mata ia.

“Mr Speaker, long Tuesday, ful Memba blong Palemen blong Kavman saet i aot witaot pemisen blong yu,” Mr Regenvanu i talem.

“Mo Wednesday aftanun ia bakeken, mi stap askem yu blong implementem atikol standing oda 96, 5 mo kanselem ol entitolmen; alaowens blong Palemen sitting blong tu taem ia.

Lida blong Kavman Bisnis, Honoroble Anatole Hymak, i talem se kavman i no save present long Palemen sitting long Wednesday aftanun from i gat wan urgent kot kes bitwin kavman mo speaker blong Palemen.

“Mr Speaker, Majoriti blong ol Memba blong Palemen long Kavman saet i stap wet long wan disisen blong Supreme Court,” Mr Hymak i talem.

Memba blong Palemen blong Tanna, Honoroble Jotham Napat, i talem se Palamen sitting i sud ko hed blong tokbaot ol impoten afea blong kaontri.

“Letem Court i dil wetem isu ia wael hemi no sud stopem prosed blong ol mata we i impoten long laef blong pipol,” Mr Napat i talem.

Member blong Palemen blong Luganville, Matai Seremaiah, i kol tu  blong Honoroble Speaker blong Palamen, Mr Shadrack, i yusum standing oda blong palamen blong dil wetem kaen situesen olsem ia.

Hemi seken taem kavman we i gat majoriti blong ol memba blong Palemen i tekem aksen ia hemi from i gat wan konstitusonal keis long supreme court long aftanun ia.

Afta we kavman saed i wokaot long Wednesday aftanun, Speaker blong Palemen, Honoroble Shadrack, i kivim faev extra minit blong karem bak kworom o namba blong Palemen sitting i save ko hed mbe i no bin posibol.

Hemi muvum Palemen sitting i ko long 8;30am tete.

Ol Memba blong Palemen i gat wan alaowens blong ova VT 10,000 evridei taem oli sitaon long wan sesen blong Palemen mo long taem we wan Komiti blong Palemen i mit.