Leader blong Opposition, Ralph Regenvanu, i askem long kavman blong mas soem sam politikol lidaship long level blong hem.
Mr Regenvanu i mekem toktok ia folem nomo namba blong ol repatriates we oli kam insaed long kaontri i bitim namba we Ministry blong Health i kam ap wetem long ol kwarentin fasiliti.
Ol helt ofisel i bin putum wan maximum namba blong 650 pipol nomo blong stap long ol kwarentin fasiliti.
Mr Rengenvanu i talem se, “Mbe kwesten i stap se wem kodinesen blong Kavman mo National COVID-19 Advisory Committee se oli stap beis long wanem akt, we helt i talem finis long olgeta se maximum ia nao, be olgeta oli putum difren namba from wanem?”
“Mi gat bikfala kosen long wok blong National Disaster committee, Director General blong Climate Change, Foreign Affairs, Prime Minister’s ofis, mo mi gat bikfala konsen long National COVID-19 Advisory Tim, ol director se oli stap act long wanem blong alaoem ol samting olsem i hapen.
“Yumi save se i gat fulap presa blong repatriatem ol sitisen blong yumi, mbe taem mi toktok wetem ol heads of mission blong yumi ova sea, mi faenem se komunikesen wetem kavman i veri pua.”
Long respon, spokesperson blong National Advisory Committee blong COVID-19, Len Tarivonda, i talem se i gat fulap presa i kam long ol seasonal wokman blong Vanuatu ova sea we i mekem se kavman i putum presa blong mas repatriatem ol sitisen ia bifo en blong yia.
Hemi talem se jata flaet we i kam long Christchurch, New Zealand nao i mekem se namba blong ol repatriates long kwarentin i inkris bitim 650 we Ministry blong Health i putum.
“ I jalenjem yumi long Ministry blong Health mo olketa long Vanuatu Police Force blong kat ova 50 pipol ova long limit we mifala i putum, mbe mi wandem explenem se hemi from long Friday mo Sunday las wik, yumi gat tu jata flaet we i bin kam long Christchurch, hemia nao i mekem se namba i ova, “ Mr Tarivonda i talem.
“ So, mifala i bin dabol jekem wetem helt tim blong yumi mo oli talem se i oraet oli andastand, mo bambae oli save handelem extra namba ia we oli silip nomo long ol kwarentin fasiliti mbe yumi wantem se long fiuja, yumi no mas ko ova long limit namba.”
“ Long lukluk blong mi, International cargo skejul blong Air Vanuatu we i bin putum aot hemi gud from oli spesem aot gud mbe wanem we bae yumi mas keaful long hem long fiuja nao hemi ol jata flaet blong lukluk blong mas save amas namba blong ol pipol i stap kam long hem blong mekem se helt mo Polis bae i save manajem ol namba.”
Mr Tarivonda i talem se bigfala namba blong ol pipol long kwarentin we naoia hemi 741, i mekem komiti blong COVID-19 i mas posponem tu repatriation flaet blong Air Vanuatu we i sud kam long wik ia.
Hemi talem se tu flaet blong Air Vanuatu ia, wan i sud hapen long Mandei we bai i kam long Fiji mo narawan long Saturday we i kam long Brisbane long Australia.
“Ol jenis long flaet ia, hemi blong alaoem ol helt wokman mo olketa security ofisa blong dil nomo wetem bikfala namba blong ol repatriates we i stap long kwarentin long Port Vila,” Mr Tarivonda i talem.
“Hemia i minim tu, se bai i nokat wan repatriation flaet long ful wik ia.”
Long seken phase blong repatriation ia, kavman i repatriatem finis kolosap 1000 pipol i kambak long kaontri.