Opposition i kol from sapot blong kwarentin kost

Opposition i kol long Kavman blong holem taet disisen blong ol repatriates i pem own kwarentin.

Disisen ia National Disaster Committee i apruvum long manis ia April.

Opposition Lida, Honoroble Ralph Regenvanu, i talem se kavman i mas kontinu blong pem kwarentin o faenem wan nara wei blong helpem ol pipol blong hem.

Hemi talem se wok blong kavman naoia hemi blong stimulatem economic mo help long taem blong COVID.

“Lates anaonsmen we i jes kamaot long eli April ia, se ol repatriates i mas pem own kwarentin, hemi wan rong disisen long view blong opposition,” Mr Regenvanu i talem.

“Kavman i nid blong luksave se yumi stap long wan taem we mani i no ron gud long kaontri mo yumi trae had.

“Yumi laki tumas we ol seasonal wokman i ko wok ovasi, oli mekem mani mo karem i kambak long Vanuatu.

“Disisen ia, komiti blong disasta i no toktok raon long hem wetem ol patna blong yumi blong lukaotem ol opsen o evidens bifo oli apruvum.

“Mi awea se disisen ia i kamaot long bodi we i lukaotem ol isu blong COVID, mo oli no sud kamaot blong anaonsem disisen ia olsem ia mo mekem pipol i sek.”

Mr Regenvanu i biliv se ol patna blong Vanuatu i save help long kwarentin kost.

“Mi save se Australia mo New Zealand, oli interes blong tokbaot isu ia from oli wantem moa wokman blong yumi blong ko wok,” Mr Regenvanu i talem.

“Tufala kaontri ia i mas kat ol opsen blong helpem ol seasonal wokman blong yumi.

“Yumi mas rimemba se bigfala majoriti blong ol seasonal wokman we oli ko long Australia mo New Zealand, hemi ol pipol long Vanuatu we oli nokat salari mo oli mas ko ovasi blong mekem mani.

“Mo hemia hemi onli opotuniti blong karem smol mani mo helpem famili; mo eni mani we oli karem i kambak mo spendem bambae i kobak long poket blong kavman olsem tax.”

Wan seasonal wokman blong Australia we i no wantem nem blong hem i kamaot, i talem se bae oli nosave pem VT 127,000 olsem kost blong 14 dei.

“Mifala i no glad wan pis, mifala i fil se mifala i wantem aot nomo long kwarentin naoia,” hemi talem.

“Mifala ol wokman, mifala wok evri dei taem mifala i stap ovasi, mo mifala i glad blong kambak mo spel; I tru se siknes blong COVID-19, mifala i mas stap long kwarentin mbe kavman i mas mekem i fea.

“Mifala ol pipol blem ia, sapos hemi jusum hotel, hem nao i mas pem.

“Mi tink se hemi mas mekem praes i ko daon o faenem wan futbol field, mifala i ko pulum tabolen mo silip long hem.

“Mifala i pem Air Vanuatu VT 60,000 blong kambak i sas ale mifala stap sendem mani kambak Vanuatu, reit blong vatu stap kakae mifala ia.

“Yumi stap long COVID ia, mani blong kwarentin ia hemi blong ol famili blong mifala ia.”

Mr Regenvanu i talem se hemi no stret nating blong kavman i jajem ol seasonal wokman.

“Kavman i mas wok had blong faenem ol nara wei from sapos hemi nosave pem, hemi duti blong hem blong kontinu blong pem,” Mr Regenvanu i talem.

Spoksepersen blong COVID-19, Russel Tamata, i talem se kavman i nosave kontinu blong pem kwarentin blong ol pipol.

Hemi talem se Vanuatu i stap long wan State blong Emergency blong COVID-19 mo pipol i mas komplae blong pem kwarentin.

Mr Tamata i talem se ol pipol we oli stap kambak long Vanuatu, oli kam long ol hae risk ples blong COVID mo oli mas stap long kwarentin.

“Long Australia mo New Zealand i gat sam fama we oli stap pem kwarentin blong ol wokman blong olgeta,” Mr Tamata i talem.

Long wik ia,  High Commissioner blong Australia long Vanuatu, Sarah deZoeten, i anaonsem wetem Prime Minista blong Vanuatu, Honoroble Bob Loughman se Kavman blong Australia bae hemi givim nara VT 1.145 billion blong help long economic recovery long Vanuatu.

Prime Minista Loughman i talem se Vanuatu i bin fesem plante jalens long las yia i kam mbe pipol blong Vanuatu i resilient.

Hemi se Vanuatu bae hemi stanap tugeta wetem ol international fren blong hem blong ko tru long ol jalens ia.

Prime Minista Loughman i talem se bae mani ia hemi ko long sekta blong education mo tourism.

Lida blong Opposition, Honoroble Ralph Regenvanu i talem se kavman blong Vanuatu i stap risivim plante asistens long ol patna blong hem, Australia, New Zealand, China, Asian Development Bank wetem sam nara kaontri blong help wetem COVID.

“Evri mani ia hemi sud ko blong helpem ol pipol blong Vanuatu,” Mr Regenvanu i talem.

“Ol mani olsem i helpem kavman blong kaverem ol kost olsem ia nao.

“Yumi stap long economic crisis ia, kavman i mas luksave.”

VBTC Nius i traem blong karem wan komen blong kavman long Council blong ol Minister miting long Tanna, blong rispon long ol komen blong Honoroble lida blong opposition mbe i no posibol.