Opposition i konsen long Palamen atendens

Opposition i talem se failure blong Kavman i atendem Palamen sitting long Thursday wik ia, i kostem ol tax payer mani.

Lida blong Opposition, Honoroble Ralph Regenvanu, i talem toktok ia folem Fes Ordinary sitting blong Palamen we i nosave ko hed from i nokat korom o namba.

VBTC i andastanem se wanem we Mr Regenvanu i minim hemi taem we Palamen Sitting i stap adjourn mbe alaowens blong ol Memba blong Palamen i ko hed nomo.

Ol tax payer hemi ol citizen blong Vanuatu taem oli ko pem wan goods long shop, mani blong tax i kamaot long hem.

Mr Regenvanu i talem se hemi duti blong Kavman blong mekem namba long Palamen sitting.

Hemi talem se ol 29 kavman bill blong dibetem long sitting ia, kavman yet i putum mo hemi mas atendem.

“Long kes blong Thursday, kavman i no bin turn ap; hemia i no wan majua atitude blong wan Memba blong Palamen from hemi dil wetem ol loa blong benefitim ol pipol,” Mr Regenvanu i talem.

Opposition Lida i rikol bak long Fes Ordinary Sitting blong Palamen blong 2020 we oli no bin turn ap long tu sitting mo kavman i bin saspendem evri memba blong Opposition.

Mr Regenvanu i talem se Opposition i atendem ol sitting blong Palamen blong diskas mo sherem tinktink long ol bill we kavman i putum.

“Wanem we yumi luk i hapen hemi failure blong kavman blong turn ap,” Mr Regenvanu i talem.

“Mo hemi putum wan kwesten long komitmen blong ol memba blong kavman blong aktuali mekem sam wok.

“Sapos yu serious long wok blong yu, yu atendem Palamen sitting blong pasem ol loa we hemi blong benefit blong pipol blong Vanuatu.

“Olsem yumi save se ova 30 Memba blong Palamen long kavman saet mbe oli save kasem 26 nomo long Thursday.”

Hed blong Kavman, Honoroble Bob Loughman, i blamem timing blong niufala standing oda we Palamen i folem naoia.

Hemi talem se plante Memba long kavman saet i no fuli folem timing blong Palamen.

“Mi putum blame long level blong standing oda,” Prime Minista Loughman i talem.

“Niufala standing oda ia hemi kat ol difren timing mekem sam memba oli kam long ol leit timing.

“Kavman i bin kat namba long Thursday blong Palamen sitting i save ko hed.”

Head blong State, His Excellency, Pastor Obed Moses Tallis, i mekem wan kol long tugeta saed blong Palamen haus blong mas kopereit oltaem blong mekem se Palamen i save tokbaot ol impoten samting we i hapen long kaontri tete.

Hemi mekem apil ia taem hemi openem Fes Ordinary Sitting blong Palamen long wik ia.

“Mi remindem Kavman mo Opposition se tufala i kat wan bigfala wok blong pleim mo bildim trast blong pablik,” His Excellency, Pastor Tallis i talem.

“Mi askem ol Memba blong Palamen blong putum asaed ol politikol difrens blong olgeta taem oli stap diskasem ol bill long Palamen jemba.

“Yumi mas tinkbaot se ol rikula pipol long rod oli no wantem lisin long ol politik blong yumi mbe wantem arem ol loa we bae yumi pasem blong benefitim olgeta.”

(Visited 1094 times, 1 visits today)

About The Author

You might be interested in