Opposition i konsen long Palemen sitting nekis wik

Opposition i konsen se kavman i no redi long ol bill blong Palemen seken extra odinary sitting long nekis wik.

Lida blong Opposition, Honoroble Ralph Regenvanu, i resen arem nogud ia long wan pres konfrens long wik ia se kavman i no infomem ol Memba blong Palemen.

Mr Regenvanu i talem se kasem naoia i kat wan bill nomo i majua blong tokbaot nekis wik we hemi Ombudsman Amendment Act.

Hemi talem se kaen fasen olsem i brekem standing oda blong Palemen.

“Beis long standing oda we i rikwarem blong Kavman i sendem evri bill i ko long clerk blong Palemen bifo 15 dei, bifo taem blong tabolem olgeta long Palemen,” Mr Regenvanu i talem.

“Mo rikwamen blong clerk blong Palemen blong sendem ol bill ia long evri memba bifo 10 dei long taem blong sitting.

“Naoia i kat wan bill nomo blong tokbaot long mandei, ol narafala tri bill i no majua blong tokbaot.”

Opposition Lida, Mr Regenvanu, i askem kavman blong mekem gud wok blong hem mo rispektem Palemen.

“Bambae yumi stap tokbaot Ombudsman amendment act, we opposition i sapotem bae i pas afta bae i nomo kat nara bisnis blong tokbaot, ” Mr Regenvanu i talem.

“From i nomo kat eni bill i majua.

“Mo i nokat eni mosen we mifala i risivim, so from wanem yu kolem wan faev dei palemen we i nokat eni bisnis.

“Narafala samting se se evri bill ia mifala i risivim vinis long odinary session; ol semak bill ia yu kam nomo putum long Palemen se ol bill ia bae yumi tokbaot mbe oli no even save mekem hem ia.”

Kavman i rispon mo talem se Spika blong Palemen nao i singaotem Palemen sitting ia mbe i no Prime Minista.

Pablik Relasen Ofisa blong Kavman, Fred Vurobaravu, i se wanem we i stap long notis we i ko aot, hemia nao list blong bisnis blong seken extra odineri sitting i lukluk long hem.

Mr Vurobaravu i talem se folem ol bill we oli witdroem long las sitting bambae kavman i risabmitim mo i sapos blong tekem tri dei blong i majua blong debate.

Palemen seken extra odinary sitting bae i stat long mandei 23 August.

 

(Visited 376 times, 1 visits today)

About The Author

You might be interested in