Opposition i kwestenem yus blong ol trak we China i donatem

Opposition i kwestenem yus blong 31 trak we China i bin donatem long miting blong Pacific Islands Forum long 2020.

Vanuatu i sud hostem miting ia mbe i kansel from COVID-19 pandemic.

Lida blong Opposition saet, Honoroble Ralph Regenvanu, i talem se hemi bin rikwestem infomesen long Ofis blong Right to Information blong save hao nao Kavman i bin yusum ol trak ia.

Hemi talem se long miting blong Council blong ol Minister long Lakatoro, Malekula long las yia, disisin i kamaot blong sharem ol trak ia mbe kasem naoia pablik i nosave hao kavman i bin aloketem ol trak ia blong yusum.

“Wan rikwes i bin ko long Jeaman blong Public Accounts Committee blong faenem aot se hu i entiltol blong draevem ol trak ia,” Mr Regenvanu i talem.

“Mo tu faenem aot ol pipol we oli no entitol long loa blong draevem wan G trak mbe naoia oli stap draevem.

“Sapos oli faenem se yes i tru se oli nokat raet long loa blong draevem, bambae accounts komiti i mekem wan komplen long Polis blong arestem evri trak ia wetem ol pipol we oli nokat raet blong draevem ol trak ia.”

Public Relation Ofisa blong Kavman, Fred Vurobaravu, i rispon mo talem se ol trak ia, kavman i yusum blong mekem seves long hem.

Hemi talem se i nid blong oli mas yusum ol truck ia from i kat sam we ol pat blong hem oli nogud finis.

“Mbe kavman i sherem ol trak i ko long ol Ministry blong hem, Deputy Spika blong Palamen mo sam politician we oli holem ol posisen blong chairmanship,” Mr Vurobaravu.