Opposition i no klad long rikwes blong ol deputy speaker

Opposition i tok akensem rikwes blong inkris long salari blong trifala deputy speaker blong Palamen.

Ralph Regenvanu i talem se Vanuatu i stap long disasta blong COVID -19 pandemic mo kaontri i no stap long nomol laef blong hem.

Hemi askem ofis blong Government Remuneration Tribunal blong mas tekem raet disisen long tinktink blong inkrisim salari blong ol deputy speaker blong Palamen.

“ Naioa hemi nomo taem blong tokbaot inkris blong salari from ful Vanuatu i save se yumi stap long wan had taem we yumi neva fesem bifo mo mi askem ofis blong Government Remuneration Tribunal blong tinktink gud,” Mr Regenvanu i talem.

“ Mi hop se Ofis blong Government Remuneration Tribunal i tinkbaot stand we hemi bin mekem long yia 2018 we hemi bin kivim wan bigfala inkris long ol salari blong olketa Member blong Palamen mo tu ol Deputy Speaker, so mi hop oli mekem wan raet disisen long rikwes ia.

Ofis blong Speaker blong Palamen i konfemem se hemi risivim leta blong tri deputy speaker blong Palamen long wik ia.

Private Advisor long ofis blong Speaker blong Palamen, Francois Chani Tabisal, i talem se ol deputy speaker ia i kat everi raet blong mekem wan rikwes olsem, mo long en blong dei hemi stap long Ofis blong Government Renumeration Tribunal blong luk se oli kat raet long inkris blong salari blong olketa o nokat.

Hemi talem se long en blong dei, ofis blong speaker bae i rispektem disisen we i kam long ofis blong Government Remuneration Tribunal.

Trifala deputy speaker ia i wantem blong salary scale blong olketa i semak long fes speaker blong Palamen.

Trifala ia, i gat Memba blong Palamen long Tafea Outer Islands, Edward Nalyal, (seken deputy speaker) Member blong Palamen blong Malekula, Assang Sanick (Nambatri deputy speaker),  Member blong Palamen blong Tanna Konstituensi, Nakou Natuman (Namba fo deputy speaker).

Mo anda long karent anual level blong salari blong ol deputy Speaker blong Palamen, fes deputy speaker i sud karem VT 5 million mo seken, nambatri mo namba fo deputy speaker i sud karem VT 1.8 million.

 

 

(Visited 37 times, 1 visits today)

About The Author

You might be interested in