Opposition i resem konsen long bisnis forum

Opposition i no hapi long pua atendens blong ol Kavman minista long National Business forum long eli October.

Leader blong Opposition, Ralph Regenvanu, i talem se miting ia hemi wan wei we kavman i save helpem ol bisnis haos mbe hemi sad blong luk se oli no bin atendem.

Hemi talem se patisipesen blong ol stet minista long kaen impoten forum olsem ia i kivim hope long praevet sekta we i draevem bigwan ekonomi blong kaontri.

“ Sapos yu wan bisnis man bae yu luk se kavman I no interest wan pis long bisnis sekta from i nokat eni minista long plesia mo olketa bisnis we oli stap trae had blong kipim bisnis i on bae oli fil daon from oli luk se kavman i no bota blong helpm olketa,” hemi talem.

“ Kavman i no bin toktok long tu dei forum ia mo hemi no reflektem wanem kavman i putum i stap.”

Wan lokol Enterpreneur, Lopez Adams, i talem se folem COVID-19 pandemic, hemi taem ol pipol blong Vanuatu i jensem ol fasen blong olketa.

“ Yumi stap long wan taem we hemi had, everi wan i mas hambol blong kam daon long semak level mo storian,” hemi talem.

“ Kavman i nosave setem ap wan o tu dei blong kam long forum ia mo mitim private sector we hem nao i draevem economi blong kaontri.”

Minister blong Finance mo Economic Management, Johnny Koanapo, I kleim se kavman i bin komitim hem wan long manis July yia ia blong toktok wetem praevet sekta.

Hemi talem se miting we i hapen hemi long level blong ofisiol.

“ Mbe kavman i asurem opposition mo ol bisnis ona se bambae hemi lukluk long ol tinktink we i kamaot long forum ia mo implementem,” Minister Koanapo i talem.

“ Every wan i traem blong kompete long ol tinktink blong olketa blong karem atensen mbe yumi mas dil wetem ol facts.

“ COVID-19 i kam mo yumi no mas wok wan wan.”

Vice Chairman blong Vanuatu Chamber blong Commerce mo Industry, Roy Matariki, i talem se hemi festaem we private mo pablik sekta i join blong faenem bes wei blong sastenem laef blong ol bisnis long taem blong COVID-19 pandemic.

Hemi talem se private sector i biliv long wok patnasip blong bisnis i save gro bak.

(Visited 45 times, 1 visits today)

About The Author

You might be interested in